林奕匡新歌《台前幕後》繼找來王敏德參與MV演出後，今次再找來向來鍾情懷舊曲風，並製作出一系列都市混搭的力臻，攜手推出《台前幕後 Backstage @the city (feat. 力臻) 》，二人一同到機舖為這個新版本拍下MV，不用埋位時，二人更一起打機。力臻為全新版本編曲時曾受原曲啟發，他說：「本身首歌好有Retro味道，所以我加咗一啲80年代Synthesizer（合成器）營造嘅打機聲音落去，再喺chorus加咗Orchestral Hit（模仿管弦樂隊中所有樂器同時合奏的效果），令到整體感覺更Y2K跳舞音樂嘅感覺。」
因為編曲上加入了電子音樂及真實樂器，今次MV都讓Phil與力臻化身剛收工的打工仔，在機舖相遇對打賽車遊戲外，亦有在街頭揸車的畫面，實行與音樂一樣，遊走現實與虛幻之間。Phil說：「今次MV裡面各自都有揸車，拍攝當日我同力臻喺凌晨時份不停兜勻香港幾轉，其中一幕要搵燈位停低傾偈，但搵極都冇，因為凌晨冇車全部都開綠燈，想拍一個簡單嘅Shot都唔容易。」在機舖拍攝現場不用埋位時，Phil與力臻都很興奮不停入錢打機，童真一面盡現，Phil說：「入嚟梗係第一時間去玩我以前喺加拿大會玩嘅Game，不過而家都變晒，好多都唔熟，所以先玩識嘅同賽車Game。」期間，Phil與力臻對打街頭霸王（Street Fighter）和賽車Game，Phil都輕易取勝，力臻笑言：「我由細到大都好深近視，所以屋企人都以為我一定係鍾意打機啦！其實唔係，我鍾意讀書係書蟲。我打機都唔叻，同朋友一齊打Online Game都一定會輸，然後覺得打機唔啱我，就放棄咗。」
其實近年Phil都喜歡與新一代歌手合作，他解釋道：「新合作就一定有新火花，因為對方接觸嘅音樂、對方成長嘅年代同受影響嘅人事同我都好唔同嘅時候，都會影響我去接觸更多新嘅音樂，對我嚟講，每一次嘅合作都好似識新朋友，我唔係一個好識去交朋友、Social嘅人，但一隻歌兩個人嘅合作係永恆嘅，我好嚮往每一次嘅Connection，因為音樂本身已經係一件好正嘅事，但要有connection先至真係有昇華。」