MIRROR+ERROR大合體
東京奧運噚晚正式開鑼，香港多間電視台亦獲得轉播權，而ViuTV星期五更派出鎮台之寶MIRROR，再加ERROR出席屯門造勢活動，頓時成為全港媒體焦點。TVB除了派坤哥到實地採訪外，更用上十多位美女主持吸引大家眼球，而NowTV同香港開電視都唔執輸搵女主持搶foul，NowTV就搵咗前單車運動員馬詠茹做主持，而香港開電視則派出《廣告女皇》冠軍李莉坐陣，兩位靚女主持你會點揀？
李莉（Lily）身為九十後（1991年出世）唔單只有青春外表，更有內函，佢喺香港教育大學健康及體育學系畢業，主修運動科學，讀書嗰陣已經做過田徑教練。之後做過Now TV體育主持，對運動方面嘅知識有一定基礎。
而且Lily充滿運動細胞，平時鍾意跑步，兼有體育教師牌和教練牌，相信要佢跑住報道東京奧運消息都冇難度。加上佢之前上《明周》節目Fit到漏都表現得唔錯，又玩得，又talk得，睇佢做節目一定唔會悶親。
馬詠茹－真運動員
馬詠茹
睇馬詠茹（Vivian）IG，對佢嘅印象有兩個字，女神。再查查佢底勢，先知道佢曾經夥拍過李慧詩喺亞運會、亞錦賽拎過獎牌。去到2019年，佢突然覺得自己表現不佳，冇咩進步空間，於是決定退役。雖然唔少人對馬詠茹當時嘅決定大跌眼鏡，但今年只得23歲嘅佢絕對唔只得可以喺運動員方面發展，做完今次東奧主持，下個目標會唔會試下入行做娛樂圈呢？
TVB人海戰術
朱智賢、姚子羚、鄧佩儀、麥美恩、陳庭欣、郭柏妍、鄺潔楹、黃碧蓮、陳約臨、黃凱儀、曾淑雅、陳苑澄、鄺美璇、何泳芍，睇完呢堆名唔好以為睇緊現代版《宮心計》演員名員，佢哋都係今次TVB東奧主持。雖然每位都算靚女，但觀眾平時睇劇已經覺得朝見口，晚見面，今次人海戰術可唔可以成功呢？
圖片來源：李莉、馬詠茹、朱智賢、姚子羚、鄧佩儀、麥美恩、陳庭欣、郭柏妍、鄺潔楹、黃碧蓮、陳約臨、黃凱儀、曾淑雅、陳苑澄、鄺美璇、何泳芍＠Instagram
