朱智賢（Ashley）前日（27日）被爆出，背男友謝東閔（Brian）偷食已婚人夫黎振燁（Jackson），兩人自爆出偷食事件後，一直潛水，今日無綫突然為Ashley舉行記者會，一臉憔悴的Ashley由被指戴綠帽的謝東閔陪同下於將軍澳電視城舉行記者會解話，現場記者會不設提問，兩個到場後即除下口罩供傳媒先合照。
謝東閔：歡迎大家傳媒朋友，咁我今日就決定咗，企出來陪佢去呢個記者會，因為我都好擔心佢承唔承受得到呢個壓力，其實……佢已經將成件事嘅來龍去脈講咗俾我聽，我亦都知道晒所有嘅嘢，咁喺現階段，我會陪住你走過呢一關，可能其實佢一時間有啲迷失，不過我覺得我自己都有啲責任，可能我成日顧住工作，疏忽咗佢，我想講嘅，其實佢係一個好勤力嘅演員，好希望大家可以俾個機會佢，自己反思下，嚟緊將來可以再俾心機工作。
身邊的Ashley聽到此番說話，不禁低頭落淚，更伸手向對方十指緊扣，
朱智賢：首先我要講嘅係，對唔住，我令大家失望，對唔住，我知自己做錯，對唔住錫我嘅人，對唔住俾機會我嘅人，辜負咗你哋，辜負咗公司，喺呢度我想同喺呢件事受傷害嘅人講聲對唔住，衷心對唔住。
說罷兩人隨即起身離開，期間有記者問她可有對黎太道歉及有否與黎振燁聯絡時，她亦未有回應！
