76歲劉江於2020年跟無綫結束38年賓主關係，他近日與呂珊接受楊紹鴻主持的港台節目《一起走過的歲月》訪問，主持人直問︰「江湖傳聞你離開無綫係因為冇對手，冇好嘅對手？」劉江直認︰「係，冇錯，真嘅。若果要講……咁會得罪好多人，唔講啦。（你仲怕得罪人咩？）唔係嘅，大家都喺度搵食。（其實好多都好戲？）唔係㗎，好戲嗰啲未必擺埋一齊，因為點解呢，好戲嗰啲，拆開晒，所以撞親嗰啲……我唔可以形容，我帶住一班小朋友去做戲，就係咁簡單。（最大問題係嗰班小朋友唔聽話？）都唔係，佢哋都好禮貌咁聽你講，不過就冇乜點樣改進咁解。」
主持人指劉江不再拍電視劇或繼續演藝生涯，是香港娛樂圈的損失。劉江聞言說︰「其實我唔係話唔做，老實講我係大鋪癮，問題就話有人搵你、有個好角色搵你先得㗎，冇呀嘛！（你成日話人呃你？）咁又係呀，每個都係老千，一定同你講你個角色好重要，呢個角色好適合你，非你莫屬。因為……好難講，因為喺嗰個電視台啲劇本質素一般，我哋去親去做日日諗點樣做好嗰場戲。其實係好難，你盡咗力，只能夠令到佢話OK啦，唔係太差，但係我哋唔係，我哋做個戲希望好睇，等觀眾不停叫好，追落去，但係冇啊嘛，呢種激情係冇。入到去開工好似覺得有啲意興闌珊。」
