艾粒昨晚的九展騷播出余迪偉浸溫泉的照片，並配有「迪偉同你浸溫泉」字句，但因事前並未得到余迪偉本人同意取用照片，令余迪偉在IG鬧爆艾粒。
事後，當奴及少爺占在社交平台發文，公開向余迪偉道歉，並表示會更改餘下場次節目內容，承諾以此為鑑，日後會更加小心顧及所有人感受。
今天（10日）余迪偉就事件作出回應：「昨晚有個朋友睇咗騷，send咗張相俾我，因為我都覺得過份咗，張相我冇同意過，亦都唔知有呢一part，我亦都冇諗住去睇呢個騷，收到嘅時候我就寫咗『Enough is enough（適可而止）！真係夠啦咁多年！』我都覺得真嘅，因為我自己身邊有好多好多朋友係受到例如職場欺凌、性別身份認同嘅欺凌等等，我曾經亦都係18年自己嘅騷講過我一單設身處地嘅事，就係我曾經有個ex，後尾成為好朋友嘅時侯，都因為承受唔到呢啲歧視嘅壓力，係職場俾人玩，屋企人嘅歧視等等，佢租咗間屋，然後燒炭自殺死咗！我到咁多年都係耿耿於懷，雖然我平時開咪就談笑風生，咩都無嘢，咩都無所謂，我係一個無所謂嘅人，我做人亦都係非常之光明磊落，但係經過今次之後，覺得我嘅嬲唔單只係要為自己發聲，亦都要為一眾受到任何歧視嘅人發聲，所以我就做咗呢件事！」
被問到會否原諒艾粒，余迪偉就表示：「我梗係會原諒，始終一齊做嘢，而係我去到某個位，我要話俾佢聽原諒還原諒，嬲都會完，但係歧視係唔會完，所以我希望藉著今次出咗呢個post，話俾大家聽係時候要停止，適可以止！希望唔會再有下次！」
相片來源：余迪偉@Instgram
