何超儀、布志綸、NoWhere Boys、Dear Jane、LMF等歌手為《The Wild Ones Music Festival》演出，超儀除了跟樂隊The UniBoys表演外，更邀請劉以達齊齊jam歌，臨近尾聲亦與LMF同台演出，令全場數千「Band友」看得熱血沸騰！超儀早前腳傷骨裂，為劉以達演唱會擔任嘉賓時亦要撐拐杖，負傷上陣，是日表演亦不例外。陳子聰大病初癒，未有上台與超儀jam歌，超儀解釋大家歌路不同，所以未有同台演出：「我試過同佢唱過嘢，不過點解合作唔到，因為唔啱歌路。呢晚好多工作人員，佢都唔敢上台阻住大家嘅，但到聽晚就搵張棉胎冚住佢。依家我腳傷係我衰啦，要達哥代我行近台邊見吓觀眾。」
超儀和陳子聰都有傷病在身，笑言在家中「互照」對方：「依家行唔到咪叫佢幫我斟杯水，其實我哋好怪，佢怕熱我就怕凍，呢啲天氣佢仲話想開冷氣，我就偷偷開個暖氣，搞到佢瞓瞓吓成頭汗。」
同場的劉以達對觀眾的熱情大為滿意，表示夠晒氣氛，希望Round 2再玩過：「係唔夠喉，聽晚我嚟撐場咋，唔好霸住個舞台，下次搵多啲Band嚟玩，都有好多未邀請。」
Dear Jane主音Tim透露早前旅行時傷了膝蓋，導致半月板撕裂，即將接受手術治療，「因為照完X光話一定要做手術，工作有少少阻礙啦，但經理人幫我安排高椅坐定定，希望快啲好翻可以喺台行吓，計劃2025年出道20周年開個大Party。」
