蔡卓妍（阿Sa）一向與家人感情要好，近日阿Sa趁住假期，專程帶住91歲嘅嫲嫲同爸爸到台中旅行，盡顯孝心。
阿Sa於社交網貼出遊南投日月潭嘅照片，並大讚嫲嫲非常「玩得」，佢寫道：「我想話我阿嫲真係好堅，下個月就92歲，仲可以四圍去旅行、行得仲快過我、食嘢仲多過我，又貪靚，一影相就話要帶返副超先。」Sa仲搞笑地hashtag「好可愛嘅少女嫲嫲bb」。
今日（7日）阿Sa與家人齊齊到彩虹眷村參觀，又喺各壁畫影咗唔少靚相，佢讚歎說：「點估都估唔到啲畫係一個97歲嘅伯伯畫。」
阿Sa深明老人家就如瑰寶一樣珍貴，所以佢去到邊都拖實嫲嫲，仲同蔡氏家人周圍食嘢，「呢幾日由朝玩到晚，由朝食到晚。返到嚟要detox吓喇真係。」
圖片來源：蔡卓妍@Instagram