上星期跟完《Do姐再Shopping》，筆者知道大家一定意猶未盡！不過唔洗擔心，因為嚟緊《公公出埠》就有四大「猛男」帶團陪大家去旅行大爆笑彈，之後仲有馬家仲會帶團同大家遊韓國過聖誕。呢兩組電視劇原班人馬拍嘅旅遊節目，你會撐邊一隊呢？
無綫四大小生，黎耀祥、蕭正楠、曹永廉及黃浩然，自從2012年拍畢《大太監》之後就做咗好兄弟。四位「太監」係《公公出埠》變身「猛男」，帶同觀眾由寒冷嘅香港，飛到熱辣辣嘅泰國布吉。，四位小生平時喺熒光幕前都着得密密實實，非常保守。不過佢哋來到陽光與海灘嘅布吉，就無懼「限奶令」盡情曬肌，觀眾們可以大飽眼福。
《公公出埠》稱得上是男版《胡說八道真情假期》，因為一眾小生平時工作繁忙，根本冇時間同成班兄弟去旅行。今次《公公出埠》既可以令四位小生有機會談談心，放鬆工作壓力之餘，仲可以讓「猛男」們發揮大男孩本色，在旅途上打打鬧鬧！相信今次節目應該歡樂十足，同時又帶有一點溫馨。
緊接《公公出埠》節目的還有《馬家過聖誕》，馬家班底繼《馬家開飯》之後再次聚頭。今次馬家衝出香港，由香港美食團，變成韓國旅行團！馬家一家人戲裏戲外，都是溫馨的家庭代表。今次一家人去旅行，有唔少得感動位，例如旅行期間正是馬子妮的廿八歲生日，馬家上下都為她安排的驚喜生日飯。呢餐生日飯，相信子妮一定畢生難忘！
來到韓國，又點少得同韓星們會面！今次馬家之旅撞正剛剛退伍的Super Junior成員東海及銀赫。雖然未知Super Junior 在節目當中有何搞作，不過二人出現在熒幕已經話題十足。但說到旅程收獲最豐富的，一定非馬壯黎諾懿莫屬！因為佢除咗可以同兩位偶像團體成員親密接觸之外，仲拎埋二人親筆簽名衫，真係睇見都覺得羨殺旁人。
部分圖片來源：互聯網
