家燕姐於活動後受訪，她坦言平日很少到茶樓獻唱：「今日係好特別嘅，因為我知道有啲老人家已經九十幾歲，真係睇住我長大，見到佢哋特別有親切感，所以今日真係好值得嚟，同大家分享啲健康資訊。」她指許多疾病亦會影響肺部，很需要大家的關注：「長者最緊要身體健康，我哋健康，屋企人都安心快樂。我真係好忙㗎，仔女又大晒，工作又接唔停，有時個女都要幫我推咗啲工作，不過我自己有個使命，覺得要同大家分享快樂，所以最緊身體健康。」
家燕姐表示現在因為工作關係，經常到不同地方拍攝及演出，忙碌得來很享受。又開學校又有個人品牌的她透露，希望稍後親自設計長者服裝。「好多人話我成日著到彩色咁，人真係要著得彩色啲先開心，尤其長者，我希望我嘅衫可以令佢哋著得青春可人、有活力。」
至於星期日（12日）的母親節，家燕姐將與四位視帝到新加坡：「我會同羅嘉良、黎耀祥、馬德鐘、陳展鵬去新加坡表演，佢哋個個都帶埋老婆去，咁我就帶埋仔女、新抱同個孫去，順便周圍玩吓。我個孫好有表演慾，所以我都同佢練咗首歌，到時喺台上唱俾大家聽。」
