情人節冇情人可以點過？首選梗係上網圍爐取暖啦，連登討論區一班網友唔單只互相勉勵，仲創意爆棚到將李克勤首經典勵志歌《紅日》改編成單身版嘅《2月14顛沛流離》，而呢個二次創作版亦已經傳到原唱克勤耳中，今朝佢食早餐嘅時候都忍唔住清唱咗兩句。
克勤清唱咗改編版《紅日》兩句喇，大家不如集氣推到佢啪晒全首～
幾時都話網民力量勁到超越國界，身在內地工作嘅克勤噚晚已經得知呢個改編版本，亦係社交網分享咗網民嘅改編歌詞並留言：「我人在賓陽工作，知道大家咁俾面，本來真係想唱一唱。反正我也不是什麼斯文人，但又驚啲仔睇到聽到，你知呢啲嘢小朋友學得最快……祝大家情人節快樂，單身的就盡快脫單，謝謝大家。」網民見到原唱回應二次創作歌詞都紛紛留言同share，希望打動到克勤親身唱呢個改編版本，而直至到今朝，事件終於有最新進取！克勤喺機場邊食早餐邊清唱咗兩句改編歌詞：「2月14顛沛流離，2月14曲折離奇。」
世事無絕對，之前古巨基都唱過網民改編版《愛與誠》，如果《2月14顛沛流離》出個無粗口嘅「潔淨版」，出名玩得嘅克勤真係分分鐘會唱晒成首送俾各位做情人節禮物。
圖片來源：李克勤@Facebook