最近幾星期，筆者發現身邊唔少女性朋友都玩緊智能手機遊戲《旅行青蛙》，喺Facebook同Instagram上幾乎每個鐘都會睇到青蛙相，甚至搭搭下地鐵都會聽到啲女士呻苦，「我隻俊俊幾日冇番嚟啦……」「係囉，佢哋真係冇本心㗎，我為佢仆心仆命，又準備三文治，仲買埋頭巾畀佢，佢淨係畀得一張明信片我，仲要連樣都見唔到！」如果唔知道佢哋講緊隻Game，真係會以為呢兩位姐姐仔咁唔好彩齊齊遇上負心漢。
講開呢隻綠色青蛙，佢表面為人真係麻麻，成日都唔理另一半出街玩，但其實唔少男星都算係半隻真人版旅行青蛙，而筆者覺得張繼聰就係其中之一（笑）。點解咁講呢？因為如果張繼聰係旅行青蛙，咁女神謝安琪（Kay）就一定係嗰位一直默默為佢付出嘅好太太。
明明想打機都要扮睇書，估唔到做蛙都好矛盾
中國傳統思想一向都係男主外，女主內，男人要以事業為重，而女人就要照顧好家中大小事務，令男人可以專心出外打拼。對生完囡囡Karina冇耐嘅謝安琪來說，呢句說話應用係佢身上應該係身同感受，因為大家都見到阿Kay為咗頭家付出咗幾多，唔單只將一對子女養得肥肥白白、健健康康，仲將屋企打理得頭頭是道。正因為阿聰背後有呢位好好嘅養蛙人，佢呢幾年先可以咁放心係銀色事業上拼搏，番到屋企同囝囝打機打得咁爽！
其實唔少大男人番到屋企都好想好似阿聰咁無壓力打機
旅行青蛙係隻Game入面非常自由，一嚟你趕唔到佢出街，二嚟你又落唔到任何指令要佢做嘢，唯一可以做嘅就係為佢準備好背包，等佢出門同收明信片。謝安琪作為一個好太太，自結婚後一直擔當緊呢種角色，冇特別向阿聰施加壓力，尊重佢工作上每一個決定。每天最大的期望可能跟你我一樣，就是等待自己心愛的人安全歸來，明信片那些通通只是浮雲。
而阿聰作為一隻負責任的好青蛙（丈夫），他對一切外來誘惑完全抵擋，所以這些年來都是緋聞絕緣體。至於他專屬的明信片當然不是隻影形單，因為愛妻如他，影相放閃點會唔預一對寶貝同老婆份呢！
買波鞋實預埋太太同一對女仔
最後，如果你同謝安琪一樣遇到生命中的旅行青蛙，記得唔好胡亂棄養，因為係你唔知佢出咗去做緊乜嘅時候，佢一定係為大家將來努力緊！
文／一支蘭州
圖／張繼聰＠Instagram、互聯網
