無綫劇集《大醬園》正在熱播中，朱晨麗（朱朱）與緋聞男友何廣沛戲中感情線日趨白熱化，朱朱更為何廣沛誕下二人的愛情結晶品！問到最新劇情，朱朱說：「只可以透露小滿（朱朱飾）幫楓少（何廣沛飾）生咗個好可愛BB，其他劇情大家自己追啦，因為疫情好多人每晚都留喺家中追劇，我依家每日都留喺屋企唔敢出街，劇中只拍咗我生仔，冇拍坐月，感覺好似喺現實生活中俾我體驗下坐月，哈哈！希望疫情快啲過去，社會快啲恢復正常。」
談到拍產子戲，朱朱大讚幕後製作今次相當認真，「BB其實係道具嚟嘅，但係造得幾可亂真，無論皮膚同毛髮，仲加埋出世時血漿，真係好迫真！」而零生產經驗的朱朱，事前還上網睇片學習，「自己真係冇呢方面嘅經驗，所以一定要做功課。今次真係發拍曬成個生產過程出嚟，我就全程係咁嗌，結果搞到第二日聲都沙晒。」
朱朱笑指自己將BB抱在懷裏，感動到眼濕濕，「完全體驗到母親的偉大。我自己其實好鍾意小朋友，希望有朝一日能夠經歷女性人生嘅另一階段，懷孕生子，擁有自己嘅血脈。」
而疫情仍留在蘇州自我隔離的朱朱足不出戶，連情人節亦全日在家中度過，她表示約了一班粉絲齊齊在網上追劇《大醬園》，「同fans喺網上一齊過情人節，都好難忘。雖然仍未播完，已經開始唔捨得，拍咗差不多五個月，同大家相處好開心，好有默契，尤其係萬家，希望有機會再聚再合作啦！」
