前無綫藝員陳積榮（Jeff）去年證實患上肺癌，今日（15/05）離世，終年38歲。
Jeff的親友在其IG發帖，宣布死訊，表示：「感謝大家的愛，Jeff於今晨在親人的陪伴下，已暫別我們回到天家。Jeff是一位溫柔的勇士，他勇敢堅毅，一直奮戰到最後，他曾說：「我好幸運身邊有很多朋友去陪我戰鬥，無論我戰勝與否，都希望用我的力量豐富大家！現在他已不再痛苦了！再一次感謝大家一直以來的支持及鼓勵！他的愛和精神會一直長存我們心裡！另外，希望各位傳媒朋友，在這段時間給予Jeff最愛的家人一點空間！永遠懷念！」
Jeff去年6月感覺肌肉疼痛，經醫生診斷後證實患上第4期肺癌，面對龐大醫藥費用，令他很沮喪，幸而得各方好友幫忙在網上發起眾籌，又得郭富城以個人慈善基金捐出10萬元幫助，病況一度好轉。
可是，他最近接受《東張西望》的訪問，透露病況又轉趨嚴重，肚脹卻手腳瘦如外星人，雖然現在仍接受化療，但戰勝癌魔的成功率不高，只有4成左右，「除咗肺部花之外，癌細胞極速擴散，包括膊頭、手臂、肚位置都有腫瘤。」他在接受化療期間，醫院不容許探病，坦言第一次做化療很辛苦，經常睡在病牀，又不能與家人見面，「佢哋只可以喺門口攞嘢俾我，或者FaceTime傾一陣。嗰陣時好唔開心，我覺得復元得好慢，日日同醫生講幾時走得，幾時可以出院。」
Jeff在患病期間，才發覺家人的照顧原來可以如此無微不至，感受到他們的支持好有力量，不禁感動落淚。他亦感謝許多人幫助，有開名的亦有暗中幫忙的，得到很多鼓勵。
孫慧雪於IG發文，隔空向Jeff訴說心聲：「Jeff，和你實在有太多太多的經歷，一起追夢的過程，實在太深刻了！所以我呢一世都不會忘記你！你好叻呀！一直撐到現在不容易，到最後，你都仲係擔心人哋為你傷心，怕自己令人失望！其實你已經好叻好叻！好硬淨呀！撐咗咁耐，要好好休息吓啦！經常在想，點解上天要揀你？要帶你走？一定係你太好啦！你已經完成咗天主俾你喺人世間嘅考驗，你可以幫佢手做事啦！或者因為你特別勇敢，可以令我哋明白更多！認識你嘅人，都知道你個性坦率、正能量，每次見你，總係有滿滿嘅計劃，每次都係充滿希望同力量！知道自己發病嘅時候，你同我講話你知道自己行緊運啦！係上天俾你一個經歷同考驗，只要過咗呢關，之後就可以繼續努力完成，好多好多你想要做嘅事，你話實在有太多人對你好，你好想還俾大家，好想用自己力量幫忙同鼓勵病友，喺你病同唔舒服嘅時候，你都係咁為人著想！」
「你教我人生健康係最重要，無需要為唔值得嘅人，或唔值得嘅事而唔開心，你教我每一個演出都好應該要珍惜！就算只係行過嘅角色，你都會好珍惜！你話人生唔需要追求物質，足夠就好，你話細細個赤腳喺士多跑來跑去，過一啲簡單生活都已經好開心，你話人生好短，一定要追夢，要努力成就想做嘅事，等自己無悔！你話愛要說出口！我全部都記住啦！」
「你成日讚我叻，我知道你鼓勵我，其實你叻我好多好多！喺你身上我學到好多，你令好多嘢由零變一百，由無變有，你令我明白敢想敢做，就會令事情發生！你重情，拍電影，都要堅持搵返同期嘅訓練班同學，你好喜歡齊心做一件事嘅感覺，多謝你俾左好多美好回憶我！俾我做電影女主角！細數我人生每個精彩時刻，都有你喺身邊陪伴同見證！好開心認識你！而家只係短暫離別，我哋來日再聚！喺呢度衷心多謝一直出心出力愛護Jeff嘅大家！我哋會忘記悲傷，重新振作！因為你唔鍾意見到我哋唔開心！」
圖片來源：陳積榮、孫慧雪@Instagram、myTV SUPER(www.mytvsuper.com)
