金像影后妮歌潔曼(Nicole Kidman)近排成為網絡紅人，事關她上載了一段自己在家徒手拯救巨型蜘蛛的短片，網民睇到都大讚佢超勇敢，更表示想不到外表高貴的妮歌，原來內裡是一個女漢子。妮歌好友娜奧美屈絲(Naomi Watts)日前驚見家中出現老鼠，第一時間就係急Call妮歌過去幫手捉！
娜奧美屈絲驚見大老鼠正在偷食她放在花園的寵物乾糧，嚇到花容失色，即刻上網向妮歌求救，想對方幫手捉並放走老鼠。沒想到，妮歌馬上回覆，表示會立即過去幫手。娜奧美就大讚妮歌有勇氣又有義氣，信她不是說笑，而是真的會幫手。而她們的對答就吸引不少網民的注意，連《新娘愛鬥大》女星姬韓遜(Kate Hudson)都忍不住留言驚嘆隻老鼠真係好大！
雖然娜奧美同妮歌都沒有再更新「捉老鼠」新發展，不過，妮歌就肯定係非常大膽。今年年頭，妮歌接受外國傳媒訪問時，大爆自己好享受食蟲，更即場示範食天蛾幼蟲、蚱蜢同蟋蟀，食完面不改容笑眯眯，嚇到在場工作人員目瞪口呆。而上星期，妮歌就上載一條段片，影住一隻巨型蜘蛛出現於家中泳池旁邊，幾乎跌入水中，嚇到妮歌兩個愛女不斷尖叫，鏡頭一轉就見到妮歌已經用杯捉到隻巨型蜘蛛，放生蜘蛛之前更好整以暇欣賞一下，同兩個女的驚嚇尖叫形成強烈對比，非常惹笑。有人盛讚妮歌的勇敢表現值得再拿奧斯卡，有人更建議妮歌參加著名真人騷《生還者》向更高難度挑戰，如果此事成真，筆者都想睇！
圖片來源：互聯網、nicolekidman@instagram