新一輯《美女廚房》口碑平平，被觀眾投訴主持無默契，煮餸過程又毫無睇頭，一句記之曰，就係唔夠上兩輯好笑！那邊廂，冋樣以「地獄廚神」作招倈的Netflix節目《妙廚大烤驗》就突圍而出，憑主持的爆笑口才和一眾參賽者災難級廚藝，成功吸引大班觀眾支持，更被譽為最好笑的飲食節目，半年內火速開拍第二季，誓要你笑到碌地！
《妙廚大烤驗》成功的原因之一是主持夠生鬼好笑！節目由諧星 Nicole Byer主持，甜品界名廚Jacques Torres做主評判，加上每集再邀來不同的甜品達人做客席評判，三位一齊評定參賽者的「烘培傑作」。Nicole Byer聲大大表情多多，仲有把非常入腦的魔性笑聲，一出場已經帶起節目氣氛，所以好有觀眾緣。她早前受訪就自言最鍾意「騎呢嘢」，所以好適合做這個節目的評判咁話。至於來自法國的Jacques就怕怕羞羞，但一見到參賽者的驚嚇作品就忍唔住笑，有網民話，剩係睇佢忍笑個樣都已經好開心。
評判表現精彩，但參賽者都唔弱。節目每集都搵三位對自己煮藝好有信心的人參賽，雖然佢哋煮到一鑊泡，但依然對成品好自豪，堅持自己好有才華，呢份莫名自信令觀眾睇到笑唔停。早前籌備第二季，節目組破格地在社交網站找人參賽，他們公開了一份食譜，叫大家跟住食譜整一塊曲奇並畫上自畫像，連同自拍照上載到社交網站，之後再從中揀選有潛質的參賽者。外國網民就好踴躍，爭相上載自己的驚嚇傑作，好多都近乎「毀容級」，好笑程度爆燈。如今第二季已經拍完，將於本月尾(6月29日)於Netflix播映，想笑餐飽的話，千萬不要錯過！
圖片來源：網上圖片