唱作王子馮允謙（Jay Fung）的新專輯《LOVE & LOSS》今日（28日）面世！今年Jay Fung多首派台歌成績大豐收，由情人節冧到暈的《報復式浪漫》、受疫情影響困在屋企悶到發惡夢的《Freakin』 Nightmare》、摯親離世無法出席演唱會有感而法寫的《給缺席的人唱首歌》和送給受情傷的朋友《Take A Breath》等，全部都衝上冠軍。當中《報復式浪漫》更獲五台No.1，為Jay Fung帶來首個大滿貫紀錄。
早前派台的新歌《Me And The Moon》充滿節日中單身寂寞感，Jay Fung說：「今次新碟主題係『LOVE』同『LOSS』，即係『愛』與『失去』，點解會有呢個主題？2021年嘅時候，我感到屋企人、朋友，fans都俾咗好多愛我，開始造新碟時寫好嘅歌關於『愛』，旋律比較輕快和開心，所以就創作了甜蜜情歌《報復式浪漫》」，之後Jay Fung的創作亦隨住經歷和感受，「大約今年三月時感到好忙，好多事情發生，無得放假，寫咗一首《Freakin』 Nightmare》。七月舉行咗我首個個人演唱會，好可惜嫲嫲嚟唔到，我寫咗首歌《給缺席的人唱首歌》送俾嫲嫲；今次專輯除咗愛情歌，仲有啲歌寫失去和遺憾，紀錄我嘅成長階段，影嘅相亦都比較成熟。」
去年Jay Fung 唱片配合吸血鬼三部曲，以紅黑色為主調，充滿電影感。今次全新專輯《LOVE & LOSS》則走成熟風格，以沉實色調為主。影唱片封面時，Jay Fung頸後有紋身、手臂和臉上有傷疤特技化妝，像真度極高，他笑說：「大家唔使驚，唔使心痛，係特技化妝，好似呀！」
為配合拍攝概念，Jay Fung承認情緒低落了大半天，拍攝期間還眼紅紅。他說：「LOSS部分，設計師和攝影師想用傷和痛去表達，除咗以紋身和傷疤化妝加強感覺，仲影咗好多感覺好沉重嘅相，拍完成個人情緒down咗好耐！不過呢次經歷好特別，有少少辛苦，但出嚟啲相我好滿意，同平時嘅我好唔同，俾大家見到我另一面。」
