假如，孝活同阿Pam趁有空檔在利物浦或附近其他東南西北歐註冊，快過打針，但要之之助助成個月，才獲批法定文件。再三試探，親家鄺大姐對大馬心如止水，就算女兒女婿落盡嘴頭，在吉隆坡擺國宴，她都不為所動。遠方天奴叔還報平安，岳圖仔的傷勢復元得快，會行會走，就跳上飛機來探望三十年前把他帶來這個世界的娘親，農場的蓋老闆，還委以重任，到時這個後生仔，做代表去相幾隻運去吉隆坡飼養的馬匹，相信又是哎吔家姊推波助瀾的功勞。鄺大姐吞完一粒又一粒定心丸，反過來勸一對鴛鴦平心靜氣先回去一轉，資助更多自力更生的下一代，過去的就當從來沒有發生過。我算一算由離開大馬至今，訂到再回去的班機，總共不夠一百個小時，用我細個會行走時，常用的擦紙膠，就任何生離死別，烏煙瘴氣，深仇大恨，不必太用力，不會擦到紙都穿，就一乾二淨。反問一句，是否太快脆，太容易？
我又贈多一個花名給孝活的老婆，叫她家嫂Pam，「你兩公婆返到去，想唔想即刻就大鑼大鼓結婚先？」
「我哋兩個唔係驚外面啲人，話個後母都未知葬咗未，就咁開心擺酒添，我開始唔抵得我爹哋都當……Howard你點形容佢？」
「我唔係刻薄，我話佢好似執身彩咁，身邊個老婆啱啱死咗，但阿天奴叔就唔抵得，手機話俾我哋知，平時收埋個二奶，已經猛追要知Pam老竇班機幾時到，要親身去接機，驚執輸……」
「既然今次我哋樣樣咁順利，我想同Howard有幾件事，都用多啲時間做好佢，農場嗰邊，阿汽水蓋Uncle讚我細佬Octo好踏實，唔似而家大城嗰啲後生仔，」
「我哋又丟低咗同奧斯陸嗰壇種子基金，要擺多啲時間返嚟，蓋Uncle話開間公司喺倫敦，等天奴叔個仔，我舅仔Octo，輪流飛過嚟學做吓生意，見多啲佢兩姊弟嘅媽咪……」
「得啦得啦，查家宅咁，Family tree個表咁呀……」
「我同阿Maria姐姐喺電話都笑到唔曉收聲，我同Howard兩個，可能同你哋兩個一樣，成日話去正式註冊，結果都唔使咁做。」
「咁咪好囉，成世都冇做，結果成世都喺埋一齊……」
「咁一陣順路仲去唔去申請咗註冊先？」兩個邊行邊打茄輪，當我係路人。
忽然我想起前日的餃子，又直筆去了中國城，「親家老爺，唔好意思叫老晒，今日啲餃子煎得過咗火位，我俾杯牛蒡杞子茶過你飲，冇咁熱氣……」
「你好彩，成三十年，有個仔可以自食其力到今日。」
「我……我其實係知道……嗰陣……係阿天奴哥有份救番我個仔，但如果跟咗我，更加冇好日子過……係你嘅，就係你嘅……」
「咁就係，你個女婿，自細都好憎我，覺得我唔錫佢，大咗仲特登冇晒聯絡……成四十歲人突然返嚟見我，我同佢，好似唔可以冇咗對方咁，唔怕失禮話你知，我咁老先至破產……但有番個仔，冇嘢開心得過。」