冤冤相報，頻死的是自己作孽的細胞。這個深宵，阿Pam的後底乸鄧天秋，終於在吉隆坡人間收工，瑪莉亞還趕去醫院捐血，可能令對方虛不受補，死得更快。利物浦這邊，老而不的元配鄺素芳，一日之間，親生愛女前來團聚兼攜愛人預告婚訊，前度負心人，還厚着面皮當往事一筆勾消，劇情過多，打背脊落，難怪血壓飊高。我等不無擔心，千萬不要冤家路窄，兩個女人，同年同月同日，在另一個悲慘世界再相逢。
哎吔家姊親手餵藥，見好姊妹Pam母面色好轉入睡，立即又押解老而不先回市中心酒店，主旨講清楚這段幾十年來，剪不斷理還亂的孽債，她送佛送到西，做判官做到煞科。
飯店副廚夫婦，堅持勿讓鄺大姐上班，他倆天光回去整頓早茶市。我和一對鴛鴦已在廳中梳化昏迷。四圍黑過墨斗，偏有教堂鐘聲，廚房卻有開火爨的雜聲，我見過一歲的ＢＢ試過夢遊，這個年過半百的親家奶奶也不出奇，她也發覺我去完厠所出來。「阿易老師，早晨，佢兩個瞓到咁稔，我煲咗啲粥，噚晚累到你哋乜都冇食過，我筆啲你暖吓個胃……」
「呢度都好多國內大陸人呵？我都未有人叫過我做老師。」
「我淥啲餃子你食吓好嘛？」
「噚日我第一個食咗啦，好好手勢。」
「你哋家教好，阿淑嫻細個好扭紋……」
「乜阿Pamela個名原本叫阿淑嫻，哈哈……」我笑到清晨會話，上句不接下句，梳化的男女也醒過來，「媽咪你做乜唔瞓多陣，快啲返上牀……」孝活相反唱雙簧，「你都冇食過嘢落肚……我哋叫架租車過嚟，車你出去，你介紹我哋去邊度食早餐都可以。」我覺得這個阿媽有仔死過翻生，未有得見一面之前，遇上我的乖仔孝活，經已恨到流口水。
「大把日子，唔好怪我眼淺……」
「Howard唔好𠱁阿媽咪啦吓，你一講嘢就搞喊佢，佢哋話你日日五點幾就摸黑返去飯店拉閘，今日你放假呀，唔准返工呀。」
原來長年累月剛剛做遊魂野鬼的鄧天秋，窮一生都用錢遙控那些讒人無賴，得知情敵下落，就趕盡殺絕，鄺大姐全靠好心地在大馬的天奴叔，有另一批老友營救，數度絕處逢生，永遠過着深居的生活，就算今時今日重新落腳的利物浦，從車廂往外看，有初到貴境的神情。
「前面咪係阿爾拔船塢？我響飯店做櫃面收銀嗰陣，順手賣嗰啲名信片，張張我都噏得出係邊度，但自己就一次都未去過，女阿女，你喺倫敦入大學嗰陣咪靜靜雞嚟西岸嗰度乜嘢……嚟搵我嘅？」
「Birkenhead呀，你匿喺得八萬幾人嘅地方，好彩咁易搵到你咋，唔使叫我女呀女，大馬有個選美冠軍都係叫乜嘢淑嫻。」
「我都好似有追過嗰個乜淑嫻，好彩追唔到咋，如果唔係而家見到有個咁靚嘅淑嫻，就真係呻笨。」
「親家奶奶，我個仔冇得瞓，把口先至咁。」
「阿女你咪有個叫Howard嘅鬼仔想叫佢出嚟見番面飲吓嘢嘅？」
「媽咪，你每日講一句笑話已經好難得，你唔夠佢哋嚟㗎啦……Howard！紅燈呀……」
我半個世紀以來，未試過一家人迫在車廂內，笑到踏蹄踏爪，如今再物色過另一家人，永不太遲。