為怕鐘點阿嬸晨早現身，砰鈴棚𠹌，水喉長射在鋅盆上，高度反映她勞碌的精神面貌，令我幾十歲人，先至開始珍重天濛光，靜到耳鳴的一兩粒鐘，鬥不過她的魔法，九秒九立刻瓦解。於是我陰聲細氣，隨口講一個大話，因我近來晚晚失眠，只有七點才開始入睡，吵醒了就會心絞痛，痛足一日……依此類推，請她佛手仁心，改為黃朝百晏才下凡，再硬塞一百元到她衫袋，講明以後可隔夜收工前，先煮好我的日夜兩餐在保暖櫃，辰時卯時我自己發落。有特赦的ＢＢ妺，要積極訓練她，早上時段不能搞醒我，不能跑跳，不能大叫大笑，一到中午十二點解禁，聽教聽話，我每日都加送特別獎。
今朝率先又破戒，我唯有發出跋扈的聲氣蒙頭反身再睡。ＢＢ知我不會反面，用手仔搞我的腳底，廚房那邊不止一個人影。女人無論怎放輕聲線，都比較刺耳。以前在公司開大會，十個麻甩佬飯氣攻心，八個有兩個頭舂舂，我次次吩咐尖聲高八度的秘書定時發聲，例必達到奪魄魂離的成效，熟睡都回到人間彈起。
「唔好嘈醒佢，你得閒監阿易老闆响屋企都著多啲件皮褸，一身汗仲好，到咁上下，就扐返去俾我，我識點樣焗返件衫有返佢陣除，走啦，我同阿ＢＢ去打完針就返工，你就同佢去公園玩一陣……」
「你冇嘢要交帶阿易老闆一聲呀？」
「嘈醒佢未死過咩……阿Maria婆婆晏啲好似又帶個人嚟見佢……走啦走啦，ＢＢ，殊……」
已是自封劏豬凳的稀客宋瑪莉亞，第一聲就撞入我的耳膜。不見不見還是不需見，目前這樣更好。但噩耗是哎吔家姊又放聲氣又帶人上來，當睇樓一樣，神秘客串巨星又乜水？累我睡意大減。同時思念超燶兼滴油的叉燒，腳一落地仍見到臨關門的人，大家神態自若，無半滴隙嫌，值得自慰。
一定是剛才阿嬸又擒青拖地未乾，我亦擒青，左右手齊上菜，打大赤腳落在水氹，表演菜梗，辣油，炒飯，爭相齊飛，上天落地，後尾枕贏一個馬鼻。有過之前跣落八級石梯的實體經驗，今勻粉身碎骨的是咖啡杯和兩隻瓷碟，除了豆瓣醬爭地盤，我今次比較孤寒，一滴紅色的液體也不肯捐出來贈興，也好，一身涼浸浸，注定又試死唔到，索性就延續那一覺，順手拈一嚿半肥瘦，含入口裏，第一次看清楚這裏的天花板，相當新淨。合上眼，就地取材，話知瞓到幾多點。
「使唔使送你去醫院呀？」一把非常生保，但又好熟悉的男聲。