十年來，我未聽見過汽水蓋做過一件傷天害理的事，今次冒險回來，吉人天相，絕非做人的報應時辰未到。側跟大大細細，都可能前世欠落，我哋兩條麻甩佬好多冤孽帳。繼汽水蓋發表完一番真心的感謝演說後，本來齊齊溫習一次離開吉隆坡的日程表，就各人背熟似真還是假的對話，就出發去原本是穩陣的大本營，但經已新鮮熱辣被裝了偷聽設備的陷阱，二人計短三人計長，八人均將計就計，詐懵如常操去發噏風，盡快引出真兇。經太子女彭美拉發現她的後底乸，與汽水蓋在北歐的政敵有利害關係，看來，攔腰殺出來的馬後炮，只要我方拚死無大害，大解脫不會遙遙無期。在廁所便秘不通，幸好有煙仔急救，我決定出發前，輪到我發表偉論。
「大家唔好行住，我哋唔好再講大話，最好人人都做番我哋想做嘅嘢……家姊你同阿蓋大班兩個咁精叻，乜嘢世面都見過晒，想做乜都做過，都做到，點解唔好好地過番啲清靜啲嘅好日子，去探吓讀緊書嘅阿Ben仔……阿師弟你最踏實，你其實好想返去青山嗰間屋度養老，你唔恨有好多錢，你唔恨日日都要掛住咁多嘢……Howard同阿Pamela佢哋冇我哋咁，船頭驚鬼船尾驚賊，佢哋好識幫我哋，情願用晒啲時間嚟幫我哋……我好鍾意睇到Pamela你一哄埋佢耳仔講嘢，Howard就乘機錫你一啖……阿Maria都係，我哋兩個同結咗婚有乜嘢分別？過去嗰半年，佢當我係大ＢＢ咁湊我，淨係想有個大ＢＢ咁着緊阿細ＢＢ……最陰功係阿ＢＢ，一歲就已經半夜起身夢遊周圍行……So sorry，我冇阿蓋大班句句咁到肉，算喇，大家唔使理我，我都唔知自己想點，講完啦，大家起程喇……」
眾人對面懵懵的我，望與不望我之間，也想不出應做何種反應，只有未知賽果的未來新抱彭美拉箱，很友善走過來，錫一啖我的面珠，很止得咳。接力的是打着呵欠醒來的ＢＢ，她仍未戒甩的是用手指開槍，很親切的射我。
今次換了七人旅遊車去山旮旯，由得家姊和汽水蓋兩母子用另一部車，盡訴密偈。彭美拉和孝活也擁上來趁高興，ＢＢ又用手指向開車的師弟後尾枕醒一槍，師弟應酬一聲慘叫，瑪莉亞重手打手板警告：「你再係咁曳，我就用膠布貼實你五隻手指。」孝活瞓多瞓少都狀態一樣：「好呀好呀，我捉實阿ＢＢ啦，膠布呢？」這對拍檔最懂製造家庭樂，惹得彭美拉也放鬆了口面，拿手機拍下他們郁手郁腳的組合。就算突然又烏天黑地落大雨，車頂的滴滴嗒嗒，更添加放下心頭石的氣氛。
「阿PK哥，你上嚟車頭，有啲嘢請教你。」
「有乜咁大陣仗？」
師弟壓低聲線：「我靚仔過嚟走埠嗰陣，成日都俾啲老嘢叫我小心啲，呢度好易俾人落降頭，我話之……」
「你想同我講乜嘢？」
師弟眼尾掃一下後面車卡，這時瑪莉亞倦極養神，孝活同ＢＢ愈玩愈癲，只有彭美拉耳仔靈光，「唔好唔信，我親生阿媽生咗我之後，原本仲有一個細佬，但未夠一歲就冇咗，醫生話係麻疹，但我阿媽話係俾人落降頭，佢都有幾年失晒常性，阿爸仲擺咗佢去山旮旯間屋度，話養病，其實困到佢仲弊啲……」
「就係我哋當大本營嗰間大屋呀？」
這時ＢＢ靜英英望過來，又用手指向我開一槍。