星二代比一般人易入行，但入咗行之後嘅發展如何，就要睇實力有幾多喇。戴上木村拓哉女兒光環嘅木村光希自正式出道後，一直備受時裝界關注，而現正進行得如火如荼米蘭時裝周，日前更見到光希的身影在天橋上出現。
木村光希以超級星二代之名矚目全球，從今年米蘭時裝騷照片中可見她的一舉手一投足與專業模特兒無異，看來要登上各大時裝雜誌封面也只是時間問題。另外，同日的照片更見到兩位時尚靚媽謝安琪（Kay）和陳凱琳（Grace）坐在席上，Kay一身打扮高貴大方，Grace則穿上運動裝外披西裝大衣赴會，其低調性感搶去了攝影師記憶卡不少儲存空間。
媒體問到兩位飛到米蘭睇騷有咩心情，謝安琪就表示自己係第一次參與國際時裝周活動，終於等到仔仔長大，有機會出國參加盛會：「真係覺得好開心！其實呢幾日我都係拍攝，未有時間去玩，但係周圍地方都好靚，真係好享受。而難得我地都可以忙裡偷閒，成Crew人一齊食餐好嘅。」而Grace就話自己有舊年嘅經驗，可以好好享受呢場騷：「因為上年咩都唔知，以為睇騷要有咩儀態之類，今年我一早裝備自己，可以享受場騷，見到每個Model出黎真係好興奮！（有冇時間去玩？）頭兩日大會冇野安排比我地，所以同經理人去吃喝玩樂，諗起都覺得自己過份。」
