Twins昨日（13日）舉行了「TWINS 25週年1314新春限定粉絲見面會」，這也是Twins出道以來首個大型Fans Meeting，意義非凡。活動分為兩場，總長達五小時的馬拉松式演出，令現場粉絲嗨到爆棚。一直以來疼愛Twins的經理人霍汶希（Mani）也親臨現場，見證兩位成員的重要時刻。開show前，湯怡（Kathy）神秘現身，送上25周年紀念蛋糕，場面溫馨又有心思。此外，場內更展出了八套Twins歷年經典舞台服裝及頭飾，讓粉絲近距離打卡，回味二人出道以來的點滴。
此次Fans Meeting邀來好友「農夫」擔任MC，活動中Twins演唱了《發夢見過你》、《你最紅》、《孖寶668》、《相愛25年》及《忠粉》五首代表作，並多次下台與粉絲進行近距離互動，氣氛熱烈。演唱完《忠粉》後，台下粉絲舉牌點歌，Twins立即展現寵粉模式：「好啦，每首唱少少啦。」隨即獻唱《雙失情人節》、《黑色喜劇》、《冬令時間》及《天對地》，讓現場粉絲享受滿滿福利。活動期間，Twins亦與粉絲進行各種互動遊戲，包括猜歌、寫揮春，以及不同組合的合照和全場大合照，氣氛輕鬆愉快，笑聲不斷。
現場播放二人的「成長」片段，看到早期頒獎禮畫面時，阿嬌感觸表示：「好多回憶呀。」阿Sa則笑說：「好搞笑呀睇返啲頒獎禮嗰啲片，嗰陣時啲鏡頭會拍到你哋㗎嘛，我真係覺得你哋好勁，打鑼打鼓，哈哈。」阿嬌補充：「係呀，成場都係你哋把聲。」阿Sa隨即肉麻表白：「其實全場其他歌手啲fans都好勁，但我覺得你哋真係最勁！令到我哋好有面子啊，哈哈。」現場粉絲隨即自動應和，全場氣氛瞬間升溫。阿Sa坦言非常喜歡這種形式的見面會，並趁機提醒粉絲找回當年的熱情：「我覺得呢幾年都弱咗少少囉你哋，哈哈。」
阿嬌也呼應，強調粉絲「要搵返個Passion」。阿Sa續說：「你哋要保持個初心㗎嘛！好似我哋咁！要保持個能耐、保持個精神。雖然你哋個年紀、我哋都係啦，大家越嚟越大，但係都唔可以『老兀兀』咁樣㗎嘛，我喺台度都唔會嗚⋯⋯ 咁㗎嘛。」她更幽默分析，可能以前沒有電話，大家才能全情投入，並詢問粉絲：「可唔可以變返以前呀？」全場即刻尖叫不斷，最後阿Sa再三強調：「嗱，以後記住我哋去到邊度都要咁呀，勿忘初心呀。」
臨完場前，Twins分享活動感受。阿嬌感性表示：「首先好多謝大家一路以嚟咁支持我哋，有一啲二十五年一直喺度、有啲係新嘅、有啲係中間加入，雖然我哋唔係成日都可以見面，但係我哋都會成日掛住大家，所以希望以後多啲呢啲線下嘅活動，等你哋唔好咁望穿抽水。」她更自曝有社交恐懼，過去太接近人會緊張，但今天現場氣氛非常溫暖，完全沒有怯場，感受非常好。阿Sa坦言出場前十分緊張，「雖然開演唱會都好緊張，但呢個係fans meeting，suppose就係同啲最熟、最friend嘅fans一齊見面，但唔知點解好緊張，可能係好耐冇見，亦都可能係咁樣嘅形式嘅fans meeting真係第一次。平時開演唱會，你哋係好遠，但呢度大家係好close，所以可能因為係咁樣就有少少緊張，所以好多謝大家今日嚟到呢度同我哋一齊玩。」活動尾聲，Twins逐一與粉絲揮手道別，首場見面會在溫馨感人、笑聲不斷的氣氛下圓滿結束。
