女團COLLAR成員邱彥筒（Marf）同陳泳伽（Winka）昨晚（7日）聯手登上《自由爵士音樂節》舞台，在西九舉行一場充滿浪漫氣息的爵士音樂會。兩人除咗合唱外，亦分別帶來新歌演出，現場氣氛熱烈。當晚她們另一半林家熙（Locker）同音樂人朱芸編亦現身台下撐場。
Marf當晚首次現場演唱新歌《海》，希望用呢首歌「俾大家療癒同放鬆4分鐘」，Winka就帶來新作《要有光》，為音樂會注入溫柔能量。兩人更大爆音樂監製徐浩為幫佢哋演出，竟放棄度蜜月回港做騷。Winka感謝監製：「真係戥佢辛苦，犧牲咗蜜月假期！」而Marf笑言：「唔關我哋事，係主辦方勁！」
音樂會尾聲時，Marf同Winka邀請粉絲寫下對演出的感受，並走落台下近距離互動。有粉絲舉牌寫上「香港樂壇充滿希望」，令兩人都感動不已。現場有人更搞笑留言：「Winka喺《造星》時跳舞爭少少，依家連頭髮都識跳舞！」Winka聽後笑住回應，指自己「喺COLLAR隊友身上學到唔同武功」：「頭髮跳舞表表者係芯駖，Ivy就表情管理，Gao跳舞力度好強，Marf記步驟最好，我依家汲取晒佢哋武功！」至於Marf則指自己「喺Winka身上吸取到光」，笑言以前偏向內向（I人），而家變得外向咗多啲（E人），工作上更能取得平衡。佢甜笑表示：「我哋都係感性嘅人，同台演出會刺激到對方，今次最正係喺後面聽你唱歌！」
被問到男友Locker喺台下跳舞撐場，Marf笑言：「台上真係睇唔到台下情況，落台先見到好多朋友！」而朱芸編亦在場支持，Winka甜笑回應：「你哋見到佢？佢長相特別。喺我眼中只可以講係靚仔，佢有嚟支持嘅。」
