車婉婉、李麗霞、女團Dreami Girls，今日（19日）出席《正能量減壓同行計劃》發布會，近日忙於拍攝處境劇的車婉婉直言有壓力，「我通常用瞓覺嚟減壓，都市人生活好急會有好多壓力，調整心態好緊要，屋企小朋友都有時會有壓力，當然佢哋未必認識咩叫壓力，開始有少少脾氣，有時叫佢做功課或做嘢，回覆時都會有啲語氣，演繹方式會不同，都好難調解，不過都係要做咗先，永遠將甜品位放後面做安慰。」她自爆今日都有壓力，「今日難得有時間可以同小朋友食嘢，泊車泊完錶位，之後居然搵唔到車匙，沿路搵都無，最後去到車旁發現原來我車無熄，車匙一直插住，嚇到我標冷汗，朋友話可能我太多嘢做，叫我放心交小朋友俾佢照顧。」
面對處境劇《愛．回家之三代同糖》收視未如理想，她零壓力，只做好演員本份，「呢排可能太多嘢拍，劇本又急，同三太開咗幾日工都需要時間磨合，現在是大家適應期，好多嘢喺腦海出嚟，之前同三太都合作過，但大家都想再有新火花，但對收視無太大壓力，交返俾高層，自己只需要控制心態開工，盡力去做好每件事，做好演員角色。」
HOY TV全新處境劇《你的保安李寶安》由原定傳出的9點半檔期，正式推前至10月26日起、逢星期一至五晚上8點首播，正面硬撼TVB同時段播出的處境劇《愛．回家之三代同糖》，婉婉說：「我唔知，娛圈百花齊放幾好，演員有工開，觀眾多選擇，幸福係觀眾，至於搶收視方面我無諗，呢方面啲問題我唔識答。」問到會否收看對台處境劇及網上俾讚，「你陰我呀！你咁問心地唔好呀！我只係覺得觀眾可以有選擇，演員有工開係觀眾同演員既福氣。」
更多現場圖輯：
