樂壇女子組合COLLAR成員Candy王家晴及Ivy蘇雅琳，昨天齊齊有新歌推出，前者新作《燈神》及後者的《原地拖手》，不約而同都主打愛情為主軸，二人分別邀請了心中男神在MV亮相。
Ivy邀請了本年度宣布進軍樂壇、港隊劍神蔡俊彥Ryan上陣客串，對於二人首度合作，Ivy表示感覺十分有趣，「其實同Ryan上星期先認識，幾開心，大家都係26年嘅新人，平時都有留意對方，好開心可以合作，我話畀阿媽知同Ryan合作，阿媽都好開心；幾有趣，平時電視見到佢，同現實見到佢有啲唔同，佢平時做媒體訪問好搞笑、好直接，現實見佢，有啲內斂，都幾cute。」Ivy續說今次歌曲有別於平時要傳遞信息，所以沒有觀點、沒有睇法與期望，純粹講暗戀感覺。
至於隊友Candy請來梁嘉進擔任男主角，Candy表示對方是她今次拍攝的首選男主角，她謂：「想搵啲合作過嘅對手，可以一嚟就對戲。」問到二人奉旨談情，可有感覺尷尬？梁嘉進指跟Candy在舞台劇合作相處個半月，再次合作感覺並不陌生，而Candy亦表示沒有尷尬，笑言感覺是一見如故，她說：「可能同其他唔認識嘅男仔，做唔到呢啲情侶間咁自然同甜蜜嘅畫面，出嚟會生硬。」
對於《直白》在網上點擊理想，未知Candy可有因此為單飛注入強心針？Candy指：「其實最大嘅信心來源係來自幕後製作團隊，今次亦好榮幸邀請到超級強大嘅幕後班㡳打造呢首歌，對佢哋非常有信心。」提到屋企人對她的單飛作品可有評價？Candy笑說：「有日我下午返屋企，屋企應該冇人，我係咁聽到《直白》首歌，以為自己幻聽，原來媽咪有兩部電話，其中一部電話長期擺屋企loop緊《直白》MV，我問佢點解要咁做，佢話係播畀屋企啲貓聽，我覺得好搞笑，佢用呢啲方法嚟支持我。今次揀歌，原本有兩首歌，我都有畀爹地、媽咪聽，佢哋兩個一致通過選擇《燈神》。」
今次再次跟COLLAR另一成員Candy王家晴同日出歌，Ivy可有擔心分散click rate？Ivy指：「一齊出歌，從來都唔擔心呢啲嘢，反而我覺得係一種陪伴，希望下一首歌都可以一齊出，有人陪伴冇咁驚。」
