上周五（3日），王嘉爾（Jackson）的《MAGIC MAN 2世界巡迴演唱會》首站於泰國開鑼，相隔一年半，Jackson再度重啟個人巡演，這次他身兼多職，擔任統籌和總監，由服裝、舞蹈編排、燈光和舞台效果等都親自參與，充滿誠意。
演唱會開場至終結，Jackson臉上的暗黑妝容逐漸抹去，於encore時更邀請台下歌迷上台開party，慶祝「王嘉爾」回來了。
今次的世巡，除了演繹最新作品，勁歌熱舞及互動環節亦全部升級。上次世巡的經典一對一粉絲福利，今次再度加碼，四位幸運粉絲可以坐在台上，超近距離觀看Jackson大跳勁舞，親身感受Jackson的胸肌，而在encore環節，Jackson即場邀請粉絲上台一起開Party，將全場氣氛推至高峰，Jackson在第一場時特別提醒，如果女士穿褲子的話，會更容易獲邀上台！
人生最黑暗時刻走出來
Jackson在完騷後，接受《明周》訪問，他解釋整個「MAGIC MAN」的企劃，在宣傳期間，很多人問他，這張專輯的靈感是甚麼？究竟想表達甚麼？Jackson坦言︰「其實沒有！大眾透過各種方式認識王嘉爾，無論演唱會、團體、K-Pop，但我感覺從來都冇一百巴仙真誠，讓大家看到真正的王嘉爾，所以我休息了一年，一年後，我想分享我是如何從人生最黑暗的時刻走出來，由好dark嘅days，到依家點樣慢慢一步一步去recovery，我相信每一個人、每一個行業，都會經歷到自己version，一個最dark嘅經歷，希望可以通過演唱會，除咗有performance，除咗有舞台設計之外，最大key message就係我點樣recovery，最緊要俾足夠時間自己。」
這次世巡由泰國展開，下一站將於澳門舉行，之後吉隆坡、倫敦、洛杉磯、里約熱內盧與悉尼等多個地方演出，問Jackson何時香港站？他說︰「都有機會希望可以返香港做，如果成事，希望大家有時間可以嚟睇，三年tour每一場對我嚟講都好special，因為唔同地區有唔同感覺，同埋氛圍，下一站就係澳門，今次加多咗啲對自己細個時比較有意義嘅地方，可以透露有匈牙利和意大利。」
談到父母在演唱會成為爆喊位，Jackson坦言，做這個project時領悟很多，「get到好多嘢，其中一樣嘢get到就係，其實爹哋、媽咪，同每一位父母跟孩子一樣，大家都係行緊同一條路，之不過佢哋行前咗少少啫，我哋喺後面，其實係一條路嚟嘅！我以後如果有細路嘅話，我哋又係一條路，同埋成日都會覺得爹哋、媽咪一世都喺度，會有咁嘅感覺，但其實唔係囉！」
問到如果父母之後到場觀看，會否更加激動？「唔敢picture，if it happens it happens，依家最擔心嘅，因為我做完呢兩場《MAGIC MAN 2》，內心比較peaceful，其實我已經recover，又冇乜擔憂，又冇乜dark，其實我已經恢復咗，咁擔心啲乜呢？就係之後唔知要做啲乜，其實係乜嘢都做得喎，可能我聽日就會出首歌叫《香蕉》、叫《南瓜》，因為依家乜嘢都可以做，就係擔心突然之間咁freedom，我依家真係keep住寫歌，做完《明周》呢個interview之後，我都要返酒店開始寫，thank you！」
更多綵排花絮︰
