剛於月前商台66周年晚宴獲頒「30年長期服務大獎」的DJ阮小儀，今早在其主持的903節目《早霸王》中，無預驚下宣布將離開商台，1ast day是10月31日。小儀在節目中強調，離職與健康考量無關，而是希望能騰出更多時間陪伴家人及享受人生，並透露有足夠積蓄應付生活開支。拍檔多年的森美在節目中表示支持，祝福她展開愉快的新生活。
小儀於節目後在社交網發文，重申離職是希望展開新生活，探索更多可能，未來仍會工作，期待與大家繼續同行。小儀留言︰「如喺節目講嘅一樣，我走喇。喺商業電台工作已經30年，自己都冇諗過可以咁長情……一段關係可以咁長久，必定係雙向嘅，你對我好，我亦好愛你。但，對唔住，我想喺而家行開一下，大膽地俾自己放手，去投入人生另一條航道。
「離開的確需要勇氣，我都考慮咗好耐，所以你唔使替我可惜，亦唔使多疑覺得有乜嘢問題發生，只係我覺得現在剛剛好。各人都有自己人生嘅時間表，節奏亦都唔一樣。我今年好純粹地選擇 想喺11月自己生日月開始，好好地完結本身嘅崗位，然後誠實地 安然地去開始我另一段小路。
「嚟緊嘅呢場人生，我有好多嘢想做，有好多嘢想試，總之就係想喺呢段日子去見識下，去感受下，去學習下，去嘆下，去寵壞下。我仍然會工作，因為仍然要食飯吖嘛，所以唔係乜嘢搵夠呀嗰啲。況且，接觸過嘅客戶們個個都好錫我，我會做好自己，有機會繼續要合作愉快。
「10月31號就係我喺903 last day，希望大家陪我喺剩下嘅on air日子，開開心心，大大聲聲，嘈之巴閉咁去度過。」
