MIRROR成員邱士縉（Stanley）今個月初趁女友李炘頤（Alina）生日前夕送上驚喜，成功求婚，成為MIRROR第一位準人夫。他早前現身銅鑼灣出席元宵活動，吸引大批粉絲到場支持，場面熱鬧。
Stanley與女友拍拖9年，早已建立老夫老妻般的默契，不過在情人節前夕，他依然識做地安排浪漫晚餐，更笑言：「我求生意志很強！」提到求婚細節，他透露是在旅行期間突襲進行，更特地找來外國朋友從旁拍攝，將感動一刻完整紀錄。他笑指：「女友投訴我專登揀佢著得最核突嗰陣求婚，但佢依然感動到喊，我反而覺得佢反應好搞笑，成件事好難忘。」他透露婚禮已開始籌劃，預算高達七位數字：「始終一生人一次，想搞到靚靚仔仔、開開心心。」
Stanley坦言，35歲結婚是他一直以來的夢想，加上與女友走過9年感情路，作為男人應該兌現承諾。他強調今次婚事絕非因懷孕或本命年「沖喜」，生BB會順其自然。講到婚後財政大權會否交由太太管理，他笑言：「咁徹底嘅嘢，我唔會討論。但我相信，對佢嚟講，我用行動已經表達咗最好嘅愛的承諾。當然將來都會同太太多溝通。」他指藝人收入浮動，自己一向有儲蓄習慣，但目前樓價仍然偏高，暫未打算置業，婚禮開支大，他歡迎情侶檔接工作，一起為結婚基金努力。
自公布訂婚後，有粉絲心碎甚至脫粉，Stanley坦言最初有不開心，擔心影響他人，但經過沉澱已釋懷：「作為一個有承擔嘅男人，我覺得自己做緊一件正確嘅事。相信粉絲喜歡嘅偶像，都應該係一個有擔帶嘅人，如果唔結婚，先會俾人鬧。」他感謝大部分粉絲送上祝福，亦喜見現場仍有大批支持者撐場。
Stanley預告婚禮將於今年底舉行，簽紙儀式會在香港進行，並會保留接新娘、玩新郎等傳統環節，但整體風格偏向低調，希望可以自在享受過程。問到兄弟團人選，他透露已精選兩位「最做得嘢」的隊友，包括Jeremy（李駿傑），另一位則要擅長「頂酒」，他笑言讓大家猜猜誰是飲得之人：「據我所知，Tiger（邱傲然）同Edan（呂爵安）都幾飲得。」提到Ian（陳卓賢）曾表示新歌適合做婚禮歌曲，Stanley即開玩笑說：「歡迎佢喺婚禮上用佢嘅歌，最好收零歌酬啦！」
