陳蕾有「樂壇社工」的稱號，這位唱作歌手，寫迷失、寫夢想、寫社會，用創作撫慰樂迷，但身邊最要好的朋友「出事」，卻沒有勇氣找她求救，原來開口要人幫助，也並非一件容易的事。
正如她由廣州隻身來港打拚，從《亞洲星光大道》走到「女金」，足足用了十四年，陳蕾沒有走捷徑，只有靠家人支援，特別是她父親，死慳死抵捱過那些年。
去年的首個紅館騷《念》，下月終於回到家鄉巡演，算是衣錦還鄉。
唱作歌手的路途，陳蕾不時遇到創作樽頸位，但在低谷期寫過不少歌曲自勉，更獲得大眾共鳴，例如講述努力追夢，誰都可發光發亮的《凡星》、在人生遭遇困境時勉勵之作《相信一切是最好的安排》、抒發對家人思念，送給到異鄉打拚港人的《當我迷失時聽著的歌》，又或如好好正視自己需要的《世界與你無關》等等。
唔算好識得安慰別人
新歌《求救的勇氣》，靈感來自陳蕾的真實經歷，「有個移民咗嘅朋友，我哋好friend，仲係舊同學，最近佢先同我講，原來之前有啲煩惱，一直困擾她的情緒，佢又唔知搵邊個講，我聽到之後好意外，點解我哋咁friend，佢竟然唔係第一個同我講！雖然我未必幫到啲乜，原來佢係驚打擾我，諗住我工作咁忙，平時啲IG story都嘻嘻哈哈，又驚會掟咗啲負能量俾我，我發覺我身邊都好多人都係咁，唔好意思去打擾別人，又或者我身邊朋友大部分都好善良，遇到好多事情，可能自己收埋喊好耐，都唔識得去搵個朋友分擔，其實講出嚟，起碼多個人一齊諗。」
身為「樂壇社工」，問陳蕾在朋友圈當中，是否都是擔任「社工」的角色？她說︰「我覺得我冇做到啲乜嘢，比較多係人哋聽我分享，我唔算好識安慰別人，反而有時我唔知點樣去處理唔如意事情，係佢哋影響咗我嘅做法，我係大大小小事都好赤裸咁講，佢哋都好想學下好似我咁，我嗰啲未必叫做求救，而係我好願意俾我啲朋友，見到我脆弱一面！因為有時自己都好想拆解下，我因乜事唔開心呢？到最核心原來我係怕失去，我怕失去呢樣、怕失去嗰樣，所以我咁唔開心，我要同人哋去到傾偈嘅時候，慢慢自己愈講愈多，先至拆解到個核心，即係點解有啲人寫日記有用，你唔寫一次，唔將自己一層一層剝開，你未必搵到自己個問題，所以我通常搵朋友講完，知道源頭係啲乜，跟住我就知道點樣對症下藥，所以我通常治療時間唔會太長。」陳蕾說她圈中的傾訴對象，主要是洪嘉豪和岑寧兒。
與舊愛分手後首次合作
陳蕾說自己比較無助的時候，通常來自演出的壓力，「依家都有啲時候會令我覺得好無助，歸根究底就係自我否定，有時一場演出，覺得自己做得唔好、表演唔好，唱甩咗歌詞、唱錯咗歌詞，我已經準備得咁好，點解上到台會錯嗰度㗎？自己就會怪責自己，係咪我心態唔夠好？有時睇到一啲留言，我記咗入腦，原來我好在意，我依家少咗玩social media，有時忍唔住睇少少，會即刻stop唔睇，最怕佢講中呀！自己都否定緊自己嘅時候，仲要俾你發現咗，所以我都係唔好睇啦！」
今次新歌《求救的勇氣》的編曲及監製部分，都由前度Mike Orange負責，這次算是二人分手後首次合作，陳蕾說︰「其實呢首歌都有同公司A&R（藝人與製作部）去商量，我都好想試下繼續同Mike合作，同埋我哋可能都依然係一種幾友好狀態，呢個我都覺得好好呀，其實我自己都幾好奇，佢喺音樂上仲可以俾到咩類型嘅歌我，今次亦係第一次搵佢造一首比較內心世界嘅歌。」與男友分手後，陳蕾表示努力為事業衝刺，暫不去想感情事。
陳蕾從廣州隻身來港追尋唱歌夢，二OO九年參加了《第一屆亞洲星光大道》出道，起初星途並不順利，經歷過不少辛酸，曾經要搬到鄧小巧家合租，解決居住問題。當年親戚知道她獨自到香港，陳蕾坦言︰「呢個俾一千，嗰個又俾一千，早期香港生活的確比較拮据。」從默默無名到踏上紅館舞台，成為叱咤樂壇女歌手金獎，陳蕾足足用了十四年時間，「可能真係多咗人認識，申請（工作證）上都容易咗，講真，如果你問獎項對我嘅影響，呢個就係一個實際影響，幫到我容易留喺度（香港）。」
遇見康堤簽約影大合照
去年首個紅館騷以《念》為主題，由《死》、《惑》、《念》、《生》四大部分組成，當中「念」是一種由心而發的相信，有「念」便會形成一種強大的力量，每一個人都其實是向死而生，每活一天，就少一天，這是無人能逃避的事。
演唱會終於宣布進行巡演，繼香港和澳門站後，七月返回家鄉廣州舉行，陳蕾說︰「我都幾期待，第一次喺自己家鄉舉行比較大型演唱會，全部親戚都喺廣州，所以我覺得最開心係有啲親戚，可能行動不便，或者唔方便離開咁耐，今次終於所有親朋戚友都可以睇到。」
今年陳蕾又多了一位同門師妹，她是陳奕迅的女兒陳康堤，兩人竟在對方簽約當日有一面之緣，「有呀！有見過，嗰日我返公司做嘢，佢應該係簽約，跟住同事就話介紹個人俾你識啦，就係『包包』（康堤乳名），最好笑係佢哋咁啱簽約完成，大家一齊喺華納個logo影大合照，嗰張大合照最終係有我份，隔離企住經理呀、老闆呀，一啲華納真高層，以及陳蕾囉，哈哈！之後嘉豪問我有冇化妝？其實包包知唔知你係乜水？哈哈！」
陳蕾說仍未有機會聽過小師妹唱歌，但至今已見了幾次面，她對小師妹喊話：「如果佢有呢個需要，我好樂意，希望寫歌俾佢，我都期待喺音樂入面認識佢更多。」
髮型︰Cliff＠moys_cliffchan
化妝：Tammy Au＠tammyau_makeup
