張天賦在紅館舉行5場《張天賦 E=MC² 演唱會2026》，昨晚（7日）開鑼，MC甫開場帶來跳唱快歌《Tipsy》、《This is MC》，然後作深情分享：「今次係我第二個喺香港嘅個人演唱會，多謝每一位有聽我歌嘅朋友，多謝賦二代。三年前第一次喺呢個舞台上面，我真係好緊張。今日其實我仍然好緊張，但係個台升上嚟嘅時候，我忽然覺得嗰個感覺返嚟啦！可能係現場嘅氣氛令到我暫時唔記得咗緊張。接下來你哋要keep住灌輸能量俾我，等我有多啲力量！」他又笑言原本的Talk位不在這裏，但昨日綵排時發現跳完舞後，回唔切氣唱下一首歌，所以臨時改動流程。他更表明不會除衫：「為咗不必要的麻煩同尷尬，今日係唔會除衫嘅，我係瘦咗，但未瘦到除得衫住，著到全白已經好叻架啦！」
為照顧四面台不同位置的觀眾，換上白色西裝後，MC即騎上巨型粉紅鶴升至四米高，一邊唱出《老派約會之必要》，一邊有羽毛飄落，給山頂朋友帶來浪漫畫面。又在另一邊於四米高斜道大玩瀡滑梯，演繹《小心碰頭》、《乖乖報到》，極近距離接觸山頂觀眾。
演唱會中段，一架染滿油漬的巨型巴士從台底升起，煙火效果配合喪屍造型舞蹈員，MC揹着電結他站上巴士頂，自彈自唱《牛馬哲學》、《第二人格》，再與Novel Fergus合唱《像話》。
首場嘉賓陳蕾與MC合唱《永久損毀》，MC笑言：「趁第一場把聲未爛，即刻請你嚟合唱呢首歌先！」陳蕾透露初次見面時，覺得MC口花花似「死𡃁仔」，撩姐姐講說話，但很開心，「2021年認識MC至今，覺得他一開始是很調皮，所以絕對是『張三歲』，多年後他依然一樣單純、透明和直率，但又愈來愈成熟，會真誠的表達自己，一路由男仔變成『輕熟男』，成熟穩重卻與日俱增！」
近尾聲時，MC換上絲質睡衣，唱出《無名氏》後深情剖白，「不知不覺去到最後一Part，換套睡衣係想提醒自己返嚟現實。世界可能好壞，食物可能好邪惡，但對人好其實好簡單。」他又罕有提及與母親的關係，坦言兒時頑皮，常與媽媽爭執，又經常不明白為何跟媽媽溝通如此困難。但近年發覺媽咪漸漸老了，他說：「愛一個人或者對一個人好，係冇需要100%嘅溝通，需要100%嘅理解。我好擔心，佢慢慢變老點算好呢？咁於是乎係每一次同佢見面，臨走嘅時候，我都會有一個小習慣，攬住佢，錫佢面珠墩一下，重要係有口水嗰隻，哈哈。用擁抱去傳達愛意。無論係親人，朋友都好，就係無論發生咩事都好，攬佢一定冇事。所以今晚返去，大家聽完呢首新歌《至少相擁沒錯》， 搵一個你愛嘅人攬下，錫佢哋面珠墩一下，要有口水嘅。」
更多現場圖輯：
部分圖片由大會提供
