剛獲香港浸會大學頒授榮譽文學博士學位的劉德華（華仔），近日接受新城電台元老級主持陳小芝、啤梨（葉文輝）及懷鈺訪問。三人昔日一起主持的節目《我芝訂》，今次是27年後再度合體，在新城知訊台復刻，將於本周五（28日）首播，華仔成為首集的嘉賓。
眾人開口第一句就恭喜「劉博士」，華仔亦祝賀小芝、懷鈺復出，似老友敘舊多過做訪問。華仔笑言，認識小芝幾十年，「數十隻手指都唔夠用」，自己當年仲揸車返工，朝早一路聽小芝節目，一路去開工，點知深夜「收廠」都仲聽到對方把聲。小芝自詡係香港廣播史上「唯一連續做12個鐘節目，而俾劉德華聽到嘅人！」，華仔聽完即場大笑，盡顯跨越30年的情誼。
啤梨則親述1994年紅館演唱會的往事，當年佢只係chorus dancer，未夠資格做main，但就做過華仔「張凳」。啤梨話：「我扮凳又升又降，等你兜一個圈去到我嗰個位停一停。」至於有冇被華仔坐過？他就話場場唔同，要睇下當日效果。華仔表示：「你要見到佢核心力有喇，我先夠膽坐。」小芝、懷鈺即場問華仔：「坐得舒唔舒服？」華仔笑住答：「我都係詐詐諦坐！」
三人齊聲承認自己都是華仔粉絲，懷鈺入行初期震住同劉生「扑咪」（訪問），華仔驚訝懷鈺到依家都仲係「緊張的忠粉」。懷鈺同小芝笑住叫華仔睇吓他們的打扮，原來27年前（1999年）三人已經以華Dee牛仔褸造型影造型照，啤梨仲話：「其實我哋好似一家人咁，亦都係你嘅粉絲，我哋追你每一首歌，到喺電台播你嘅歌，依家可以坐你隔籬。」
講到新歌，華仔透露可能會出新歌，即時被三人包圍催促。小芝復出做返DJ，即場話終於可以狂播，仲提議一出碟就訂首播、book簽名，甚至再搞一次「劉德華日」，全日所有節目都係華仔，所有歌都係華仔，好似當年試過12個鐘專場一樣。華仔聽完笑住答應：「咁就靠你哋啦！」
