綜藝舞台劇《人夫集團》昨日（10 日）於西九文化區戲曲中心上演頭場。古天樂、黃子華、劉德華、張學友、陳潔靈、林峯、張敬軒、Twins、容祖兒、方力申、林盛斌、連詩雅與丈夫陳家樂、衛詩雅及醫生丈夫等大批圈中好友，紛紛送來花籃致賀。
場外設有多個打卡位，當中最搶眼的莫過於專屬張繼聰、鄭詩君（C 君）、陸永權（陸永）的頭盔架，貼上「必須戴頭盔」「進入婚姻範圍」「注意安全」等抵死趣緻的警告標語；現場亦設有扭卡機以及紀念品銷售區。
張繼聰、C 君、陸永三位「人夫」於演出當中跟觀眾互動連場。開場時三人突現劇院側邊，仿如婚禮進場般出場，又跟台下觀眾握手合照，引發全場氣氛高漲。張繼聰上台即大膽發言：「婚姻係一場冇終點嘅馬拉松，坐得喺呢度嘅都係英雄！」引得場內不少情侶與夫妻紛紛鼓掌回應。
C 君提到過去兩個月不斷聽到觀眾投訴「買唔到飛」，張繼聰就笑言：「期待值高到咁？你哋坐得喺度，仲未明呀？人生係冇嘢值得期待㗎！」農夫二人即時起哄：「嘩！原來你嘅婚姻咁悲慘㗎？」張繼聰馬上戴上頭盔解圍：「稿嚟啫。」其後農夫繼續打趣，指另外兩位的太太知名度不高，唯獨張繼聰的太太謝安琪家傳戶曉，更號召全場大喊「振夫綱」，鼓動張繼聰爆老婆秘聞。
張繼聰接著笑說：「一個二個想我返唔到屋企？我老婆今日喺度喎，好！嚟呀！我老婆讀咁多書乜都唔識，唔識老㗎！廿年仲係咁 Young，出街好似老夫少婦，你話佢係咪曳呀！」C 君隨即接話：「知你唔方便講，等我講！嗰個謝安琪，一日到黑喺屋企，唔出街，幾咁顧家。」
三位「人夫」戴穩「頭盔」後進入劇情重點，邀請一眾男士加入「人夫集團」。三人道出團體的理念：「你永遠會喺度搵到比你更加慘嘅人，就算結咗婚，你都唔係孤獨一個人！就算你畀人趕出廳，我哋都喺廳！跪玻璃，我哋一齊跪！」
演出完畢接受訪問，三人依舊「戴頭盔」自保。張繼聰感謝兩位拍檔：「喺創作方面佢哋有較多創作部分，佢哋用晒啲腦汁，我只係負責演繹，好好彩，大家咁喜歡個表演全靠佢哋功勞。」C 君就打趣透露，謝幕名單上標註資料由張繼聰提供。雖互相謙讓邀功，陸永表示劇中內容是不少人夫的心聲，屬於已婚男士的共同語言；在旁的謝安琪亦笑著認同：「佢哋講有啲嘢係真嘅。」陸永又笑稱，真正的總監其實是張繼聰。
劇中不乏拿太太開玩笑的橋段，但三人不怕觸怒另一半，劇本大方讓太太們過目。C 君把講稿隨便擺放家中任太太翻看，陸永太太亦完整閱讀過劇本，而謝安琪更親身到場，以行動支持丈夫演出。
