陸永與C君組合農夫出道25年，近日他們終於有自己的公司「農作天下」，英文名「So Fa So Cool」。二人表示：「農夫開張咗25年，今日自己公司終於開張喇，以前淨係耕種自己嘅農作物，而家耕埋幕後主辦、創作、製作塊田，以前淨係耕自己塊瘦田，而家發現，其實所有同行、投資者，創意工作者都係農夫，大家都默默耕耘，日後如果大家鍾意，耕田可以一齊耕，夾手夾腳，將農作物豐收遍天下～」。
他們在社交網貼上公司內部的兩張照片，裝修前室內沒傢俬，裝修後也只是多了幾張椅和放在地上的招牌，二人開着香檳。陸永指：「張裝修前後圖，係好反映到呢廿五年我哋手嘅經濟狀況。」並補充：「就係多咗少少，又唔係好多」。
C君就表示：「以前農夫同人合作最多都係希望幫人寫吓歌，而家終於有個空間可以合作同人寫吓稿、寫吓劇本、度吓show、監吓製，合力栽種，但願所有創作人嘅農作物豐收遍天下。」隨後他更預告：「第一個將會可能同你一齊耕作嘅係… #港笑 #全港棟篤笑大賽 #2026 #1月 #農作天下」；陸永則謂：「做棟篤笑真係要好大嘅勇氣，搞個比賽就直頭係膽生毛。」
