草蜢前晚（3日）現身廣州南沙音樂秀場，擔任「2025超級草莓音樂節」第二日表演嘉賓。當日是音樂總監何秉舜生日，草蜢團隊演出前在後台為他慶祝，既唱生日歌又切蛋糕，非常熱鬧。同場演出的周柏豪和莫文蔚亦先後與草蜢在後台相遇，他們開心敘舊並互相打氣。
草蜢以《失戀》、《暗戀的代價》和《華麗舞台》等勁歌熱舞打頭陣，炒熱氣氛。他們預告明年一月底將再到廣州舉行草蜢「RE : GRASSHOPPER演唱會」，觀眾以歡呼聲表達興奮。他們之後唱出《ABC》、《半點心》，又跟觀眾大合唱《寶貝對不起》，當然也少不了新鮮出爐、由蔡一傑作曲的新歌《老的辣》，壓軸表演的《忘情森巴舞》更讓全場high爆。
45分鐘爆汗演出後，草蜢大呼「好爽」！蔡一傑說：「我哋好耐無做戶外騷，而且第一次參與『草莓音樂節』，好多後生嘅觀眾都識唱我哋嘅歌，好似做緊草蜢演唱會咁。」蘇志威表示：「我哋好鍾意喺音樂節表演，因為可以將草蜢嘅歌帶畀不同年齡層嘅樂迷。」蔡一智坦言：「黃昏時候做戶外騷，觀眾望上舞台見到好靚嘅燈光，我哋望住觀眾加上黃昏日落magic hour嘅畫面好靚，好特別嘅彩蛋！」
出道40年以來，草蜢的無數戶外演出之中，蔡一傑最難忘出道第6年的歌迷會成立日的戶外演出，「當日傾盆大雨，周圍水浸，我哋決定繼續開騷，我哋汗水同雨水融合又唱又跳，好難忘。」蔡一智和蘇志威最難忘的是2021年，為紀念師父梅艷芳，在渡輪上舉行的迷你音樂會。蘇志威說：「當日喺海上由日頭唱到夜晚，又係magic hour，晚上維港景色，好難忘。」
今年中秋節期間，草蜢將身在武漢演出，蔡一智感到好開心，「中秋節同成班親密戰友一齊表演和賞月，係最好嘅節目。」蘇志威說：「Dancers同埋Band都係草蜢團隊大家庭，可以喺中秋節同佢哋一齊演出係我哋嘅榮幸。」蔡一傑更發起「交換月餅」遊戲，期待抽中特別款式的月餅，蘇志威預告會帶埋囡囡Yumi出品的月餅應節。
