米雪今日宣布《友你有米55派對騷》加開一場，今日特別請來羅家英、白彪、羅霖等好友支持，三人更宣布擔任嘉賓，米雪笑言之前得知開騷排練，心理壓力加上體力，每日食足四碗飯，今次宣布加場要食六碗飯，「上次要食四碗飯，𠵱家要食夠6碗飯，因為一排完舞就肚餓，練完歌，因為肚又要用力又肚餓，每日都好開心同充實，仲可以練到蛇腰，到時觀眾可以台上睇，好多謝朋友支持，幾忙都要抽時間宣傳，今次扣除開支，會捐給慈善機構，我好開心，因為喺我哋年紀仍可以活躍，都可以俾出正能量，自己需要付出時間及練習，做人咁多年，可以做個回憶同榜樣，唔單止唱歌跳舞，可以組織更多正能量。」
擔任嘉賓的家英哥上台攬住米雪祝賀，笑言阿姐（汪明荃）俾，尹佬（尹志強）都俾，家英哥表示兩人識於明星足球隊，「因為同尹佬踢波，所以都識咗好耐，我94年喺澳洲踢波之後識咗尹佬，之後大家又鍾意打golf同按摩，成日都會上深圳按摩，其實我同米雪一齊唱過歌，演過戲，又喺北京唱《帝女花》，今次我哋會合唱《紫釵記》，所以我特別攞咗阿姐屋企支釵嚟送俾佢，其實加場好難，我當然要上台唱歌，一首合唱一首獨唱，我有鋪癮上台，其實同麥花臣好有淵源，我細時喺麥花臣練戲，又係我練波嘅地方。」
