由陳曉華、馬貫東、吳若希、阮浩棕、韋家雄、陳熹潼、王綺琴、王菲、許俊豪、黃嘉雯等聯合演出的TVB新劇《死有對証》，將於明晚（7日）首播。
劇情圍繞患有強逼症的熱血P牌女法醫程芷昕（陳曉華飾），夥拍「毒舌老油條」林琛（韋家雄飾）及「衝動刑警」高俊（馬貫東飾），聯手偵破一宗又一宗離奇案件。與此同時，兩名記者——「快狠準」詹柏宇（阮浩棕飾）與「貪靚新丁」單佩嘉（吳若希飾）亦從旁夾擊，令案情更添變數，緊張之餘不失搞笑位。
今日劇組率先發布兩位港姐級小花——王菲及黃嘉雯的劇照。飾演馬貫東女友兼瑜伽導師「施美寧」的王菲，劇中有大量教瑜伽場口。從官方劇照可見，王菲身形弗到爆，零贅肉的蛇腰配以堅挺臀部，線條極為吸睛。至於首個單元《人肉三餸飯》中飾演核心角色阮碧鳳的黃嘉雯，則以多套短打造型亮相，大騷長腿，同樣搶鏡。
原來王菲的弗爆身形得來不易，拍攝前她做足準備功夫。本身屬瘦底的她，除了勤練瑜伽提升柔軟度，更刻意操肌增肌，打造健美線條。王菲透露：「本身都有做開瑜伽，但嗰期為咗角色即刻上密啲，筋鬆到近乎做到一字馬。因為我由細到大都偏瘦，冇特登減肥，反而係驚自己冇肌肉，上鏡望落會『了』，所以專登搵PT做Gym增肌，等個人望落挺身啲、實淨啲，有返啲線條感。嗰時主要操手臂、大髀同Pat Pat。拍嗰期可以話係我最弗嘅時期，但因為都係三年前嘅事，依家少咗運動又年紀大咗，都開始肥返少少。」
