商業一台即將播出的原創廣播劇《我所聽見的未來》由石修、陳志雲、馮素波、黃文慧與梅小惠攜手聲演，並邀得阮兆祥、周殷廷及黃妍客串。石修聲演一位懷才不遇的歌手「夏守正」，對「成功」二字有著難以釋懷的執著，角色帶有濃厚的「中二氣質」。首度聲演廣播劇的修哥表示：「好新鮮！今次係我第一次參演廣播劇，以前做電視劇、拍戲，係連埋動作同所有鏡頭一齊去做，今次唔需要照顧其他嘢，用把聲去講就得。」
陳志雲突破以往形象，挑戰風流、吊兒郎當又充滿壓抑的角色，聲演一位表面灑脫、實則空虛、幽默中帶點蒼涼的編劇「司徒文泰」。Stephen笑言：「廣播劇而家真係好少做，咁認真而且仲有咁多老戲骨、資深嘅演藝界朋友嚟做係好難得。錄音過程嘅趣事可以拍另外一部劇出嚟，我哋唔係淨係做廣播劇咁簡單㗎！一有少少空間嘅時候，犀利啦！波姐又唱粵曲，我又唱，個個都有份玩。」
馮素波聲演的「李心悅」，是一位身體虛弱、依賴高科技照顧的長者角色。她外表溫和，但笑容背後卻藏著「不能說的名字」。波姐表示：「參與今次廣播劇畀我好多回憶，因為我十幾歲嘅時候，爸爸都有搞廣播劇，我仲係細路聲，但已經演少女角色，好開心畀我可以隔咗五十幾年都可以去做廣播劇。」
黃文慧聲演神秘莫測的「陳蓉蓉」， Bonnie姐說：「呢套劇好前衛，我一直睇劇本都唔明，一人身兼多角，係咩原因呢？原來呢個角色係一個老人家，佢有啲老人癡呆，諗返自己少女嘅時候，就會係少女聲；突然間覺得自己係一個江湖俠女，又會好凶神惡煞。我覺得呢個劇好科幻、好新奇，希望大家會記住收聽。」
梅小惠聲演智能屋管家「黃蕾」，首次展現感性內斂一面，脫離以往的喜劇框架，小惠分享：「故事裏面我係一個開心嘅照顧者，內容竟然同我實際照顧媽媽嘅情節差唔多，所以我都好感觸。喺屋企讀自己獨白嘅時候都已經流淚，編劇寫嘅時候一路寫都喊咗幾次，好驚喜會有呢種感覺出現。希望透過呢一部劇鼓勵多啲照顧者，畀多啲正能量佢哋。」
此劇以超現實科技題材及跨代演員陣容，帶領聽眾走進一棟名為「2號A」的智能村屋。劇中性格迥異的長者與科技代理人，過著看似平靜卻充滿張力的未來式樂齡生活。隨著一位新住客的到來屋內打破了原來安穩的生活，每個人內心的情緒缺口與人生遺憾也被逐層揭開。《我所聽見的未來》合共10集，7月20日至8月31日逢星期日中午12時30分播出第1至7集，9月6日至20日逢星期六晚上7時30分播出第8至10集。
更多圖輯：
