黃凱芹將於3月在紅館舉行兩場演唱會，Chris今日（14日）出席記者會，甫開始，大會先播出黃凱芹作曲、填詞、鄭丹瑞獨白，由Chris與周慧敏、阮兆祥、余劍明合唱的新歌《數十年後》。Chris相隔4年再踏紅館，他表明這次不會唱別人的歌，「以往演唱會我都會唱吓人哋嘅歌，或者自己作畀人嘅歌，但今次作為紀念入行40周年嘅演唱會，係有特別意義，講真要喺我唔同階段，譬如寶麗金同飛圖年代，同埋之後自己出歌，其實要揀都好多歌選擇，所以唱自己歌都未必唱得晒，今次演唱會特色就係唔會唱人哋嘅歌。」
至於到時會否邀請周慧敏、阮兆祥、余劍明合唱新歌，Chris指未成事就無謂開空頭支票，「我以往演唱會都好少請嘉賓，但係我40年前係電台出身，搵呢班舊同事一齊合唱係有特別意義，估唔到咁多年後大家都仲喺呢行發展，大家亦都喺唔同崗位，阮兆祥做咗開心果，Vivian歌影視都有工作，余劍明就係媽咪同人哋嘅妻子，但同時亦有做DJ，大家過住唔同嘅幸福人生，做緊自己鍾意嘅工作。」他最希望能夠邀請到恩師分享喜悅，「我入行係鄧藹霖帶住我，佢教咗我好多嘢，係我恩師嚟，真係好希望佢可以參與到今次演唱會。」
更多現場圖輯：
