周慧敏（Vivian）的《地老天荒愛一場世界巡迴演唱會》，昨晚（31日）於澳門倫敦人揭幕，並宣佈今次巡演後，決定不再做大型巡迴演唱會！令不少歌迷不捨大哭。
Vivian昨晚一共換上五套服裝，狀態滿分，令觀眾驚嘆她毫無歲月痕跡，依然仍是當年顛倒眾生的女神。演唱會以《自作多情》及一連串快歌作揭幕，又唱又跳讓現場即時進入熱鬧氣氛。她向歌迷打招呼說：「大家好！唱完一輪快歌開場，真係好有動力呀！我對今次巡演真係充滿期待，內心喜悅要大爆發，我好Ready啦，你哋Warm Up未？啱啱啲快歌，好似帶番我返90年代，諗番我第一次個人演唱會，《94美的化身演唱會》，嗰陣自己跳舞似機械人，有邊個睇過？」觀眾席立即傳來歡呼聲，她續說：「哈哈，不經不覺你哋就跟我30年！我見到唔止觀眾，有80後，90後喎，重有00後小朋友，歡迎晒你哋一家人來睇我個騷，呢30年人生充滿意想不到的事，真係冇諗過自己仲企係舞台度。快歌之後，呢個騷第一首慢歌，我要送俾我人生第一位支持者，我天上嘅媽媽！《台下女主角》，多謝大家。」
Vivian在演唱會中，從小時候成長開始跟大家分享人生感悟，每段講話都讓歌迷很感動；當她唱完《肋骨》後，又跟大家分享：「2009年，我成為咗人妻，同年因為信仰，我多咗個天父爸爸。呢年係我人生轉捩點，我將一套普世價值嘅生存之道放低，一步步拆毀自己嘅強悍，將個『我』字縮細，發覺好多嘢都唔同，特別我哋做藝人，好多時人哋將我哋放到好大，我覺得唔係一件好事，我放低『我』字，反而睇到自己好多不足，執着放低，誠實面對自己，我學識接受自己有好糟糕嘅時侯，有好軟弱時侯，順服於我所有景遇之中，我開始發現，一直係我頭上面嗰個光環，冇能力再綑綁我啦！我喺裏面被釋放出來，得到真正嘅自由，所以我唔係女神，不過係一粒好細嘅鹽，有時會發下光嘅阿V，好嗎？」觀眾即以雷動掌聲回應。
Vivian又反問歌迷，「你哋生命中有冇遇過天使？」歌迷大叫，「有呀，你呀！」她笑道：「我焗你哋講㗎！哈哈，我生命中有好多天使，剛剛唱完嘅《如果你知我苦哀》係哥哥（Leslie）寫俾我，佢都係我一個肩上天使，扶持過我嘅前輩，我永遠感激佢。你哋（歌迷）都係我天使，無論高低，多謝你哋都守護我。」然後她便請出演唱會特別嘉賓黃劍文，「以下呢一位朋友，我哋都係互相守護，係同行者，歡迎黃劍文加入我演出。」兩人隨即合唱了《流言》及《情未了》、《知己》三首歌。
來到演唱會最後一部分，Vivian除了跳唱不少經典歌曲，更第一次於台上演奏《貝多芬月光奏嗚曲：第一樂章》，她說：「其實我喺2022年聖誕節，錄咗第一首鋼琴演奏曲，我好開心，今晚我想彈《貝多芬月光奏嗚曲：第一樂章》俾大家聽，我彈琴唔叻，如果冇自己舞台，好難有機會公開演奏，所以我唔理啦，我要好好彈一次！因為我相信每一件事用心用愛去做，就有感動人嘅能力。」觀眾即掌聲不斷，並大叫「好感動呀」，「多謝你呀」，「愛你」等等。
Vivian在嗚謝環節，殺歌迷一個措手不及，令現場不少人落淚，反而台上的她就強忍淚水，「其實今次巡演同自己講，搵最純綷心表演，為愛我的人唱歌，人生去到唔同階段，追求需要都係會有好大改變。今次這個巡演，的確係每一場都是倒數時間。今次應該係我最後一次個人大型演唱會啦！」歌迷聞言忍不住落淚，有不少人大叫：「唔好呀！唔得呀！」她續說：「因為我覺得時侯差不多啦，要專注自己照顧自己身體，照顧我家庭，貓仔都唔細啦‥‥‥我想多啲時間陪貓仔，同先生希望有更多共處時間，你地應該理解係咪？」歌迷繼續大叫：「唔可以！」她安慰道：「我係唔會唔工作。只係想有多啲時間調節自己。時間好快，錯過咗就錯過咗啦，好似今晚咁，好快就過，已經演唱會尾聲啦，要唱最後一首歌，我好想聽到大家，大大聲一齊唱《最愛》。」
演唱會結束，觀眾不停叫安歌，Vivian再出場，連續跟觀眾一起大合唱了近六首歌，最後呼應演唱會名字，以《天荒愛未老》一曲真正作結。
