蕭正楠與黃翠如去年4月於紐西蘭註冊，二人婚後一直忙於拍劇及商演，早前趁住假期，雙雙飛抵日本過二人世界，慶祝結婚一周年。
翠如連日於社交網分享多張旅行靚相，見佢每張相都露出甜蜜笑容，相當幸福！唔知翠如旅行期間係咪胃口大增，網民發現佢發福不少，更有人留言話翠如充滿孕味，「是否懷有小魚腩？」令粉絲們非常好奇。
而翠如今日（23日）亦有貼出遊日照片，佢很欣賞老公嘅攝影技術：「我很喜歡這張相片，他很喜歡這個地方。」
阿蕭則上載短片，並寫道：「我隱約見到晴子小姐喺電車嘅對面。」仲話張相好難影，要特別鳴謝揸機嗰位。原來阿蕭兩公婆去咗著名景點鎌倉高校前站潮聖。
喺呢個咁經典嘅漫畫場景，當然要打吓卡，見到阿蕭有型地插袋影相，睇個背影都有幾分似櫻木花道！網民都話翠如就係阿蕭晴子小姐，二人係天生一對。
圖片來源：蕭正楠、黃翠如@Instagram