衛詩雅（Michelle）不同其他電影女明星，她比較「斜槓」，既拍YouTube、又玩TG group與八千幾人吹水，甚至會主動搲角色，「基本上知道有導演開戲，我好多時都會厚住面皮地打去問『有冇角色啱我呀？』好多導演都好好，會俾機會我。」
做藝人，表面風光，收入不穩定， Michelle直言︰「初入行時候都算幾好，中間其實經歷咗一段好難行嘅時候，收入好唔穩定呀，唔知應該點做，好迷惘，好彩我真係鍾意演戲，我會為呢個興趣而繼續堅持行落去。」沒有收入，只能向公司墊支，「一路都還緊（錢）㗎，哈哈！因為我哋簽約係有預付合約金，慢慢還，應該可以還到八十歲，我諗我會同時間做其他嘢，好似拍吓YouTube，但演員這條路就唔會變。」
Michelle是「連登」常客，最近因為家燕姐認錯她是連詩雅，恭錯喜，又再佔據「連登」帖文，她說︰「我前兩日上去睇，見到有人話我剪短頭髮carry唔到，呢啲濕濕碎，如果IG留言話我，我會撳返入佢account，睇吓佢個樣係點囉！」
有辣有唔辣，與其他電影女明星更不同的是，衛詩雅很貼地，自發功創出一條血路。自一九年開始，Michelle經營個人YouTube頻道《衛食攻略》講飲講食，現在已擁逾十九萬followers，這位女明星最吸客的，不是服裝手袋，而是砂煲罌罉。關於「貼地」，Michelle笑說︰「我冇升過上天，一直都貼住個地。我有嘗試過，但係我扮唔到（離地）！講真，我自己都係網民啦，我認我會開啲account撐返自己㗎，自己做自己打手囉！」
一八年，正是Michelle入行十年的時候，拍過一條紀錄短片《紀錄．十年．衛詩雅》，當時的她，正面對事業低潮，片中Michelle提起父母時，兩行眼淚不停流，「嗰陣時仲係好低潮，爹哋媽咪好擔心，到依家其實佢哋都擔心，唔代表話曝光多咗、有咗提名就唔擔心，他們擔心嘅嘢唔同咗。其實我都想趁今次呢個訪問同佢哋講，其實你哋個女好叻㗎，唔使擔心，我由細到大都算堅強，我從來唔會喺佢哋面前喊。」
Michelle在上水太平邨長大，家有一姊一弟，很多人都說，家中排行決定了孩子的個性，夾在中間的孩子，多數都比較獨立。Michelle自小已很懂得為自己打算，為了安全感，她考了很多牌照，「我有車牌、船牌、潛水牌、救生員牌、鑽石鑑證、寵物美容、動物傳心術，連導遊牌都有，點解要考咁多牌呀？因為我冇安全感，我驚自己會失業，所以乜都讀咗先，將來冇工開、搵唔到工都有一技傍身。我細細個已經有呢個不安全感，如果幾日冇開工，我會覺得好浪費時間，一定要搵啲嘢做吓。」
入行多年，圍繞Michelle身邊的朋友，大部分都是在影圈打滾，甚麼崗位都有，Michelle對每個崗位的工作都瞭如指掌，「我對電影幕後任何一個崗位都有興趣，除咗導演，我諗我一定唔會做導演，做導演太辛苦喇，同時間要兼顧嘅嘢太多，同埋要不斷幫人解決問題，我比較擅長製造問題，喺片場大小問題，第一時間就係煩個導演，我唔想做呢個職位，我覺得每個導演係有少少被虐狂，太辛苦啦！」
說到最愛的崗位，演員才是首選，而每次接到新角色，Michelle都會花時間與角色「對話」，好似拍攝《失眠》時，她會分別用姊姊和妹妹的角度去寫日記，父母都已習慣了Michelle這些行徑。問到Michelle還有甚麼角色想演？她說最想演全CG（電腦合成影像）的電影，「得一塊綠布，所有嘢都靠自己幻想來演，應該很有挑戰；第二個呢，我覺得衛詩雅以前做得太多被害者，成日被傷害，好弱，我依家強壯咗，想做一啲大家姐或者傷害人嘅角色，唔想再被傷害。」
十六歲還未加入英皇前，Michelle已經認識Mani霍汶希，當時Michelle為《Yes！》偶像雜誌做模特兒，她透露了一個小秘密，「當時Twins已經好紅，我相信係搞gimmick，話會加入新成員，Mani有提議過簽入英皇，其中一個可能性就係加入Twins，冇話一定嘅，而同一時間，我同細佬一齊casting《四葉草》，我中咗喎，第一次嘗試到演戲滋味，我就選擇咗演戲了，依家諗返，就算我想選擇入Twins，可能到試音的時候，他們就會知道我唱歌跳舞有幾差，點會俾我加入，哈哈！唱歌？我唔敢有興趣呀，我唱過一次㗎啦（與洪卓立合唱《很想和你在一起》），真係人生污點，如果網絡欺凌想傷害我的話，話我把聲好老牛、依家好老、個胸好細，呢啲都傷害唔到我，只要一播呢首歌出嚟，我自尊心就會跌到落谷底，求吓大家，唔好播！」
最後問Michelle，名字常鬧出笑話，有沒有覺得被自己的名字拖累？她笑說︰「直頭係啦！當初公司唔想我叫做衛詩雅，就咁叫詩雅，諗住唔好撞衛詩（衛蘭胞妹)，跟住Shiga（連詩雅）就出道喇，應該就唔好改，叫做衛詩雅，霸住先，哈哈！」
攝影（封面）：Matt Yau
攝影（花絮）︰伍敏慧
形象︰Katy Tsa
化妝︰MW
髮型︰Wil Tam＠ArtifyLab
服裝：TORY BURCH, ANTEPRIMA, SHIATZY CHEN
