H
Anson Lo 的新歌《King Kong》MV出了四天，在YouTube 的點擊率已經超過180萬（周一下午二時），走勢凌厲，今明兩天直向200萬點擊衝線。成績好，Anson Lo固然高興，因為他今次兼任導演，他也不忘向合作的單位及人員說多謝，甚至在IG發了一段千字文感想，文中也透露了現在的MV版本不是他的原稿，因為時間關係而胎死腹中。
Anson Lo 千字原文：
「準備呢首歌之前，花姐問我想做咩類型嘅歌，我答：「我想做一首大家末聽過 Anson Lo唱嘅跳唱歌。」好多謝每一位支持《Mr. Stranger》嘅你哋，你哋令我更有信心去做唔同嘅嘢。
今次辛苦 Edward @edwardchan_emp 團隊嘅用心，加入咗好多唔同嘅電子同band sound少少嘅音樂元素。一如以往喺出歌前三日我地都仲繼續fine tune 緊 mixing，日以繼夜去改良首歌
過程係好辛苦同煩惱，辛苦你哋！
好開心今次再次同 Oscar @oscarlee 合作，寫出咗一份我認為適用於任何職業、情景下嘅「競爭」同「比較」。唔止係我依家嘅職業，細個時我家姐同我都有一種無形嘅比較，學業上同言行舉止上；去到小、中、大學同同學嘅比較、教跳舞時舞技嘅比較，相信我哋每個人每一日都經歷緊比賽。而《Kingkong》好想帶出即使呢個世界嘅競爭幾激烈都好，只要你有進步同努力嘅心，每個人都可以做自己嘅第一，做自己最強大嘅King Kong。 King Kong再強大，都末必能夠同其他人比，因為每個人嘅King Kong強大嘅地方都唔一樣今次第一次做MV嘅導演，坦白講係好需要超級大嘅體力同「腦」力。要應付平日自己嘅工作加上劇集拍攝，時間比以往拍任何MV更加唔夠用 ，已拍攝當中休息嘅時間好少，因為每刻都要主導同決定拍啲咩～ 但我好享受成個創作同執行嘅過程！辛苦水哥團隊 @waterchan10、花姐@ahfa0908Karson團隊 @karsonliu 同 Virtual Set 團隊連夜一齊開會逐一解決每一個問題。今次一開始因為時間嘅限制，要放棄我原本諗好咗嘅故事同主題，從頭嚟過，的確係幾驚，但「整親手指事件」前往去睇急症科醫生嘅車程中，我突然好想飲水，但右手手指用唔到，得返左手又開唔到水樽蓋，嗰一刻嘅口渴令我逐步諗到依家MV呈現嘅主題。
MV一開頭向電影 《The Maze Runner》 致敬。故事講述一班人被送到一個沙漠，眾人喺好口渴嘅情況下要爭奪成個地方唯一支水，大家為求生存而作出唔同嘅選擇。MV裏面，大家一齊玩緊一場生存嘅競爭遊戲，有人為咗搶到支水而傷害別人，有人面對競爭只會坐以待斃，有人會願意同人分享，有人會用奸險手段達到目的。最後即使支水倒瀉咗，兩男都繼續因為唔憤氣而作冇意義嘅鬥爭，導致兩敗俱傷。
但其實大家點解唔一齊分享水源，一齊等待，一齊努力，各自做好自己本份，可能就可以一同接受最後嘅雨水，記得第一次畀教母睇完MV first cut，佢話：「大家搞咁多嘢就係為咗支水呀？」有時往往當局者迷，「比賽」中嘅「競爭者」認為最後爭奪到嘅嘢好大件事、好重要，可能跳出嚟睇末必係一件值得要佢地互相踐踏去得到嘅事或物件。所以從來比較只須同自己比，競爭只需要同自己爭，做到自己嘅最好感謝排舞師 Rock Sir @rockinair 同 Dancer 朋友們喺兩次排舞
session一齊完成個dance piece~
辛苦幫我逐個逐個拉鍊扣人手釘埋、整衫整到手指流血又反甲嘅Pinky@pinkxnik Rachel@rachii 、迪迪同裁縫姐姐；化妝嘅 Rainbow@kwankwanchung 同整頭嘅Denny @dennyku328
多謝振宇同威強攝影團隊嘅協助，同埋 Karson 美術團隊、服裝團隊同武指團隊嘅配合，4位主演角色同每一位幫手掃沙嘅工作人員都辛苦啦！
每一次嘅成品都唔會係完美無瑕，知道自己有好方面可以做得好好多，但今次係我好鍾意亦係花盡心思嘅一個project。好多謝每一位神徒。依然支持住我，知道近日大家因為撲飛而有好多唔同嘅壓力同唔開心，好希望哩首歌成為其中一樣陪伴住你地過每一日嘅元素
但願大家都可以成為自己心目中嘅King Kong~」
圖片來源：Anson Lo@instagram
