尹光及方力申今日（17日）出席《父親節爆旋陀螺大激鬥》MV發布會，兩人合唱《老豆》父子兵對唱版。問到方力申如何慶祝第一個父親節，小方表示：「希望我同太太一家三口有自己時間慶祝吓，但又會同父母食飯慶祝，反而岳父嗰邊就遲少少，因為佢哋嗰邊有人病咗，暫時唔見住，囡囡依家6個月，期待佢叫爸爸，但佢已識得叫媽媽，我冇呷醋，但我一直覺得佢會叫爸爸先，因為我覺得佢每次見到我會笑得燦爛啲，總之輸咗俾老婆就係輸咗。」
小方早前為太太拍婚紗照及補辦婚宴，同日更為囡囡舉行百日宴，「其實喺3月舉行，主要補影婚紗相，因為我在美國求婚都無擺酒，當時好多嘢都我話事，返嚟香港只係兩家人食飯，當時結婚相在美國影，唔算，始終女仔想可以更靚啲去影來留念，所以返嚟香港就全部一次過做晒，今次只係兩家人一齊慶祝，順便囡囡百日宴，影埋結婚相，當晚我有唱首好冧嘅英文歌俾佢聽，太太聽完都好感動。」問到會否再追個仔湊成好字，「都想再追，但太太餵緊人奶，太太喜歡母女間感覺，唔想停餵，不過我結婚時老竇話要傳宗接代，但而家佢見到孫女之後，就叫太太可以再生多個女都無所謂，所以仔或女都無所謂。」
尹光表示父親節要在內地工作，「阿仔喺澳洲住，但我哋不時會facetime，有兩個孫女一個十歲，一個四歲，大孫女3歲過去，雖然都講英文，但都識中文，大孫都識寫我中文名，我會俾利市佢獎勵佢，其實佢哋每年都會返香港探我，我就等孫女放假就會去澳洲探佢哋，孫女會帶我去食美食。」
更多現場圖輯：
