莊思明（Lisa）與楊明拍拖9年，兩人經歷不少高高低低，不時傳出好事近，Lisa今日出席《慧妍雅集》記者會，再被問到是否好事近，她即否認，「佢未求婚，但成日都有口風漏出嚟，所以都已經無咩驚喜，我知佢已經買咗隻好貴嘅戒指，不過我都慣咗佢無咩驚喜同儀式感嘅人，其實我哋相處咁多年，結唔結婚都無咩所謂，日日都見面，又一齊住，即使結咗婚都差唔多，所以無咩渴望轉變，雖然佢唔係浪漫嘅人，但同佢相處最開心係細水長流，生活上佢會好照顧我。」Lisa笑言唔怕俾人催婚，只怕大家問到悶。
另外，《慧妍雅集 43 週年慈善晚會 2025 》將於3月29日舉行，屆時朱玲玲及趙雅芝會出席，身為會長的朱凱婷表示希望善款創新高，她與老公今年都會碌人情牌，問到她會否感壓力，「幫慧妍做咗廿年司儀，今次仲以會長身份去搞慈善騷，有時壓力大到會失眠，以前仲成日會發開口夢講司儀稿，老公都會成日俾我嘈醒，我哋都已經習慣晒。」
