家英哥揀選《佘太君掛帥》一劇是為紀念故友尤聲普，劇中反串「佘太君」一角，「同佢做咗40幾年師兄弟，我做每套戲都會有佢份，佢開嘅新戲一定會搵我做，我同佢、李奇峰三個人經常合作，一齊排戲、食飯、談戲劇，我哋三對夫妻都會一齊飲茶，而家佢哋兩個都走咗，我哋傾偈係將1950年以後嘅香港粵劇嘅歷史講出嚟，普哥會將自己做小角色時嘅事講畀我聽，佢仲會話『你記住佢，唔係以後冇人知㗎！』但係，普哥對唔住，我真係唔記得咗，所以呢套劇係懷念普哥。」
《曹操與楊修》是家英哥與尹飛燕開山之作，燕姐回顧跟家英哥合作已數十個年頭，「我初出道到成為正印花旦，一直都有不少機會同家英哥合作，家英哥能夠演出到80歲真係好難得，隨住年齡增長同人生閱歷豐富，演文戲會比後生時更加出色，相信今次演出一定會好精彩。」
汪明荃跟家英哥合演《荊釵記》，阿姐表示今次演出有一定難度，「雖然呢套戲以唱功為主，對我嚟講有啲吃力，但依然希望可以展現最好嘅演出，家英哥喺同一行業工作70年，係非常唔簡單，並祝願佢喺80歲時能保持最佳精神同體力，好好照顧身體。」
記者會上家英哥再提到參與八和會館競選的目的，「八和唔單止係一個會館，佢係我哋嘅根，係守護粵劇呢團火一百六十幾年嘅燈塔。我喺呢個舞台行咗七十年，見證過粵劇嘅黃金時代，亦深知今日經營之不易。我明白大家對生計嘅擔憂，亦理解年輕一輩對前途嘅迷茫。如果我當選，我嘅核心工作將圍繞三個『心』。」 家英哥又表示：「主席呢份工，係一份責任，更係一份服務。我渴望用我餘下嘅精力，回饋呢個養育我一生嘅行業。我唔係要帶領大家，而係要同大家『齊心協力』，一齊行。」
更多圖輯：
