內地歌手李昊在紅館舉行一連兩場《李昊「數到一」香港演唱會2026》，昨日（30日）尾場請來多位大卡嘉賓驚喜登場。
一開騷先見姜皓文、陳國坤各自帶住一幫人打對角行上台，上演一場古惑仔戲碼，李昊被塞入麻包袋掉上台，呢個登場方式確係特別！然後唱出演唱會第一首歌曲《離譜》。換上黑金西裝的李昊披上黑色披風一連串唱出《躍龍門》《冬蛾》《磨洋工》等歌曲。
李昊請到王祖藍登場合唱《浮誇》，唱完他解釋與王祖藍的緣份是由什麼時候開始：「我跟祖藍哥喺2022年嘅時候認識，當其時我見到佢就膽粗粗講：『我係你嘅忠實粉絲，我好鐘意你最新嘅呢個角色，我好想同你做朋友，我當其時係咁樣講嘅。咁佢就話無所謂啦，做朋友交個微信啦，呢份友情就係咁樣撻著咗啦。我去年嘅『28個我嘅演唱會』入面，祖藍哥親自嚟到現場，佢喺慶功宴時問我：『李昊你有咩目標啊？下一個目標係咩啊？』咁我又膽粗粗咁同佢講話，祖藍哥啊，我想開紅館啊！咁佢話，哦紅館啊，可能佢心諗：『呢個小子呀，膽子有點肥，點知喺某一個夜晚，佢突然之間微信我話，喂！李昊，你係咪想上紅館啊？唔通又係福祿壽啲整蠱電話，我以為係TVB啲節目。』」最後王祖藍便向李昊說：「李昊，我幫你申請到去紅館啊。」在王祖藍的角度，認為李昊早晚都能在紅館開演唱會：「有冇我唔重要，但是在這個時間點裏面，我們剛好遇見彼此，然後我有這個榮幸在這個道路上面陪你小段路也是非常開心的事情。」
「講多無謂，行動最實際。」王祖藍下台前跟李昊說：「最後要跟你說，其實所有來過香港開演唱會的朋友都知道，在香港任何一個歌手，哪怕你是四大天王，開演唱會超時都要罰款的！支票我已經準備好了！」「王老闆」夠氣派！
然後又一驚喜，曾經在《聲生不息‧大灣區季》合作過的林子祥登場，二人合唱《大丈夫》x《真的漢子》，林子祥更和李昊繞場一周同fans互動！李昊難掩興奮向林子祥送抱！
今次演唱會除咗唱歌環節之外，仲有多段小短劇穿插，李思捷、林保怡分別現身，前者李思捷飾演導演用書一巴巴咁車落李昊度，睇到全場fans勁心痛；後者林保怡則演李昊嘅爸爸，「父子」之間嘅感人對話，令李昊在台上爆喊；完騷後李昊亦有講到同「爸爸」林保怡私下嘅「父子情」，又搞笑指台上多次爆喊純屬係戲嚟啫！
李昊又自揭細個唔生性，待爸爸離世後先後悔未能盡孝！再引用偶像星爺金句「做人如果冇夢想，同條鹹魚有咩分別？」，隔空星爺對話，揚言會成為更優秀嘅人！
