張德蘭今日（14日）出席《張德蘭情若真巡迴演唱會》澳門站記者招待會，她的老公楊偉誠更到場支持，全程為她拍片，大會現場送上價值8萬元美金的黑膠唱盤。張德蘭表示，對於早前香港站相當滿意，再舉行澳門站難免會有點壓力，因為所有嘢都會重新編排，「好難得，因為我對自己要求好嚴，所以會緊張，做好多事前工夫，不過自從上次跌親後，依家動作會慢啲，唔好太心急，以前自己都控制唔到自己，依家會小心啲，睇清楚啲就會安全少少，都係一個好好教訓！今次所有嘢重新編排，歌單都會重新編排，但有啲歌一定要唱，唔唱，歌迷會唔開心！我希望大家聽我唱之餘，都可以一齊唱，感覺會好溫暖。女仔貪靚，會有靚衫配合，我都叫設計師俾啲新感覺，今次可能會有不同，都想有啲新鮮感！演唱會要不停練歌、練舞同練氣，嘉賓方面都會玩盲盒，等大家去估下，會有啲驚喜！希望可以搵到陳玉蓮，我都好掛住佢，唔止我想，係大家都想！」
提到每次到澳門，小時候的回憶都會湧現，「記得當時14歲在夜總會唱歌，要派保鏢保護我，當時好多地方都唔去得，不過依家就可以食澳門美食，又有豬扒飽及萄撻，好多景點都想去，好似聖堂同大三巴，之前試過喺大三巴做《歡樂今宵》，又同『4朵金花』試過做騷，好有回憶，一定要去行下！」
