修哥和家輝爭請客。
94歲修哥胡楓活到老學到老，自兩年前入駐小紅書後，好勤力拍片分享。昨日愚人節，修哥上載相約好友飲茶相聚片段，笑言：「今（昨）日係4月1號愚人節，咁我就約咗幾個『愚人』嚟嘅，點知呢幾個蠢鈍嘅人呢，居然嚟呢度半島飲茶，既然係咁，我就要同佢哋傾吓偈。」
第一個被修哥點名亮相的是張繼聰，修哥十分識做幫阿聰4月9日在麥花臣開騷宣傳，並問為何不帶太太謝安琪到來？阿聰表示因為女兒放假，老婆負責帶囡囡去玩，他就負責來跟修哥飲茶。
接下來修哥就問在場最頑皮的那個不知願意上鏡否？然後戴Cap帽和眼鏡的張家輝把頭伸向鏡頭，修哥話聽聞家輝到東莞開演唱會，家輝隨即又幫修哥宣傳，表示修哥6月7日舉行的演唱會，他和阿聰會組成一個組合到來表演。家輝和阿聰在討論到時唱什麼歌時，修哥即指家輝最拿手唱《眼睛想旅行》，還會跳舞。
修哥跟住讚家輝：「你呢個『愚人』真係唔話得，不過咁樣喎，你對羅蘭講：如果你唔去飲茶，我就唔會叫胡楓囉喎！」修哥跟住把鏡頭轉向坐在身旁的羅蘭姐，並問道：「今日開唔開心啊？（開心！）因為家輝叫我哋嚟飲茶，其實我約㗎！」家輝即謂：「點會你約，我約㗎！你又搶我啲功勞！」
羅蘭姐叫他們爭夠再說，然後自言只是很想見家輝，因為很久沒見面。家輝解釋：「因為我就嚟要上大陸拍戲，一走咁耐，咁我去之前同你哋飲餐茶先。」91歲的羅蘭姐雖然說話時中氣好像比較弱，但精神很好，還精靈問：「咁一餐咋？」家輝即說：「咁我返嚟梗係再食啦！」羅蘭姐再笑謂：「我諗住食幾餐！」家輝即刻答應，但修哥卻說：「張家輝講吓㗎咋，你估真嘅咩？你當真就傻啦！」羅蘭姐直認是傻，因為她是當真，被修哥笑指她這世人最失敗就是這次：「信人唔失敗，信呢個（指家輝）就失敗。」羅蘭姐叫家輝站起來澄清，家輝說隨便吧，被羅蘭姐讚「乖乖仔」。
修哥最後總結說：「呢樣嘢證明呢，羅蘭係信你唔過嘞，係咪啊？」羅蘭姐即反駁：「我冇話我信佢唔過，你咁樣講又變咗夾硬屈我。」修哥說不過就話到此為止，叫大家跟網民說拜拜，羅蘭姐再反抗：「我本來唔想咁快拜拜嘅，但係佢依家監咗我要同你哋講再見！」說完再見，畫像完結，但修哥聲音再次響起：「最後……都係張家輝爭到請客！」
