由毛舜筠、林日曦領銜主演，聯同白只、楊偉倫及胡麗英合力炮製的舞台劇《大死撐日》，橫跨三個多月，一連上演 44 場，昨晚（3日）假香港演藝學院歌劇院圓滿落幕！
尾場謝幕時，林日曦親自向毛舜筠獻上花束，感謝她多月來用心排練、極致嚴謹的專業追求，以及每一場都毫無保留、傾情投入的真摯演出。毛姐坦言最後一場感觸良多，想藉此機會與現場觀眾分享內心說話。首次踏上舞台劇台板的毛姐直言，今次參演是一段極奇妙的緣分。她透露自己從小聽粵曲長大，但當年與父親的喜好卻大相逕庭，「我爸爸係新馬迷，我屋企每星期都有人上嚟大鑼大鼓唱大戲，不過爸爸就淨係唱新馬仔嘅歌，我就鍾意聽任白。」她透露過去兩度與舞台劇擦身而過，「過往我曾經有兩次機會做舞台劇，連合約都簽埋㗎喇，但係都因為一啲原因，最後我都冇做到。」今年是毛姐入行 50周年，能在這個時刻圓舞台夢，對她而言別具紀念意義，「直到今年，亦都係我入行 50 年，先真正第一次踏台板，做我第一次、亦都好可能係最後一次嘅舞台劇，而呢套劇，竟然咁啱，就係有關粵曲，你話係咪一段好奇妙嘅緣分呢？」
毛姐又笑着指向林日曦，表示：「之前第 8 場、第 39 場、第 42 場，呢個人都無啦啦突擊我，要我毫無準備咁樣喺謝幕嘅時候唱粵曲。今日唔使突擊，今日呢個係我自己嘅決定。我決定送一首曲畀大家，唔止係觀眾，仲要送畀有緣走埋喺一齊、台前幕後所有人！」在揚琴伴奏下，毛姐即席獻唱《鳳閣恩仇未了情》，為大家送上這份特別的禮物。
毛姐最後感觸表示要感謝一個人，「我要好多謝呢個人呀，因為其實‥‥‥我係佢偶像嚟㗎‥‥‥」說罷，她稍作停頓，隨即邊笑邊指着林日曦修正：「佢係我偶像嚟㗎！」林日曦即時打趣回道：「你頭先講得啱呀！」引得全場爆笑！毛姐笑着補充：「佢係我偶像，所以今次呢個合作，佢話佢好似發夢咁，其實我先係發夢嗰個！可能係我人生嘅唯一一次舞台劇，竟然係同我偶像合作。」
對於能與偶像毛姐合作，林日曦亦感性回應：「超過四、五個月嘅相處，唔知係咪淨係得我啦，有時會忘記咗喺我哋眼前一齊合作嘅，係毛舜筠呀！請你諒解我有時突然間唔記得，但一醒起嗰陣呢，就覺得好似發夢咁神奇，真係無言感激！」二人隨後在台上緊緊相擁，現場觀眾報以全晚最熱烈的掌聲與歡呼聲，，為一連 44 場的《大死撐日》劃上完美又動人的句號。
