TVB台慶劇《玫瑰戰爭》片尾曲《大娛樂家》,由三位女主角林夏薇、姚子羚、傅嘉莉獻唱,並破格以濕髮Look拍攝MV,引爆熱議。昨日(15日),劇組首播由周嘉洛、吳業坤及張振朗「肉帛相見」的「惡搞版」神還原MV,立即成為熱話,劇組官方IG僅一晚已錄得逾1.8萬Likes及超過50萬點擊!
MV中,周嘉洛、吳業坤、張振朗齊齊赤膊濕髮上陣之餘,還刻意塗上「嬌艷」唇彩,三人各有不同演繹,負責扮演子羚的振朗,全程落力戚眉,形神俱似,就連本尊子羚亦忍不住留言讚好:「好正呀!張振朗你連條眉都學埋我呀 !」嘉洛仔當中最認真一位,全程零笑容、目光如炬扮演薇薇,獲網民大讚「搞笑得嚟好似好認真更好笑。」最搞笑非刻意惡搞傅嘉莉的坤哥莫屬,全程表情浮誇到極點,刻意「擠眉弄眼」,有網民發現鬼主意多多的坤哥,期間不斷夾胸搶鏡,成功吸引網民點讚「鎖骨」極迷人:「坤哥鎖骨同個膊靚到呢,眼睛同Kelly都咁靚」、「坤哥唱到好痛苦」。雖然演繹得入型入格,但可惜全程只是「咪嘴」演出,有網民呼籲劇組公開「男聲版」,並期待台慶可以安排三子跟三位女主角上台獻唱《大娛樂家》。
總監製鍾澍佳受訪時透露,原來安排三子背後極有心思,張振朗與姚子羚是《反黑英雄》CP、坤哥與傅嘉莉是《刑偵12》CP、周嘉洛和薇薇則是《寵愛Pet Pet》CP。佳導又表示為了精益求精,歌曲由當初獨唱改為三人合唱:「其實做呢首片尾曲花咗好多時間,改咗好多次Melody同編曲,之後再同Music Director江暉傾,究竟要點樣唱法先好?因為原版第一首Demo係一個人唱,但我覺得部戲係講緊一班女人喺度爭影后同一姐,咁其實好似首歌拆開三個人唱可能仲有趣,跟住我哋就做咗呢個片尾曲版本。」
佳導續說:「我哋拍呢首歌嘅時候,因為想要嗰種感覺,其實喺今時今日娛樂圈,每一個女演員都好似係赤裸面對所有觀眾、冇乜隱私,所以先會揀著Low-cut 露膊、好赤裸咁去拍MV。」佳導透露在拍攝原裝版時已想到要找來不同藝人「惡搞還原」,才誕生現在的三子版,他表示在拍攝時笑到肚痛:「佢哋三個本身又玩得又有創意,所以拍嘅時候已經好笑到癲。」佳導為了向劇中演員送驚喜,大家一直保密至昨日《玫瑰》記招才首度公開有這個惡搞MV,此舉完全是想帶出台前幕後銳意娛樂大眾的精神:「因為《大娛樂家》嘛,所以想好玩啲。」據知,劇組稍後將推出MV拍攝幕後花絮。
更多圖輯: